ق ر وقۋ-اعارتۋ ءمينيسترى الماتى قالاسىنىڭ قوعامدىق كەڭەسىنىڭ كەزەكتەن تىس وتىرىسىنا قاتىستى.
كەڭەس قۇرامىنا قالالىق ءماسليحات دەپۋتاتتارى، ۇكىمەتتىك ەمەس جانە دەنساۋلىق ساقتاۋ، ءبىلىم بەرۋ ۇيىمدارىنىڭ وكىلدەرى، قوعام، مادەنيەت قايراتكەرلەرى كىرەدى، دەپ حابارلايدى aqshamnews.kz.
وتىرىستا ءبىلىم بەرۋ سالاسىنداعى وزەكتى ماسەلەلەر تالقىلاندى. اسىرەسە مەكتەپكە دەيىنگى ۇيىمدار مەن جەكە بالالار ورتالىقتارىندا قاۋىپسىزدىك پەن قىزمەت ساپاسىن ارتتىرۋ، ينكليۋزيۆتى ءبىلىم بەرۋدى دامىتۋ، مەكتەپ ينفراقۇرىلىمىن جاڭعىرتۋ، بالالاردىڭ تاماقتانۋىن ۇيىمداستىرۋ، سونداي-اق تەحنيكالىق جانە كاسىپتىك ءبىلىم بەرۋدىڭ كەلەشەگى تۋرالى ءسوز قوزعالدى.
مينيستر ءوز سوزىندە قوعامدىق كەڭەستەرمەن ديالوگ جۇرگىزۋدىڭ ماڭىزدىلىعىن اتاپ ءوتتى.
«ءبىز وڭىرلەردە ءماسليحات دەپۋتاتتارىمەن جانە ۇكىمەتتىك ەمەس ۇيىمدار وكىلدەرىمەن تۇراقتى تۇردە كەزدەسىپ كەلەمىز. جەرگىلىكتى ماسەلەلەردى اشىق تالقىلاۋ – ءبىلىم ساپاسىن جۇيەلى تۇردە ارتتىرۋعا جاسالعان ناقتى قادام. ءبىلىم بەرۋ سالاسىنداعى مەملەكەتتىك ساياساتتى جۇزەگە اسىرۋدا سىزدەردىڭ كومەكتەرىڭىزگە سۇيەنەمىز. بىرلەسكەن جۇمىس پروبلەمالاردى انىقتاپ قانا قويماي، ولاردى شەشۋگە دە مۇمكىندىك بەرەدى. ءبىزدىڭ ورتاق مىندەتىمىز – ءاربىر بالانىڭ الەۋەتىن تولىق اشۋعا قولايلى ءارى تەڭ جاعداي جاساۋ. بۇل دايەكتى تۇردە جۇزەگە اسىرىلىپ كەلە جاتقان ۇلتتىق باسىمدىق»، — دەپ اتاپ ءوتتى عاني بەيسەمبايەۆ.
وتىرىسقا قاتىسۋشىلار ءوز سۇراقتارىن قويىپ، تولعاندىرعان ماسەلەلەردى اشىق تالقىلادى. اشىق ديالوگ فورماتى قوعامدىق پىكىردى ەستىپ قانا قويماي، ناقتى شەشىمدەر قابىلداۋعا مۇمكىندىك بەردى. ايتا كەتۋ كەرەك، مۇنداي تاجىريبە جۇيەلى تۇردە جالعاسىپ، قوعامدىق كەڭەستەرمەن كەزدەسۋلەر ەلىمىزدىڭ بارلىق وڭىرىندە وتكىزىلەدى.