قاراعاندىدا ۇيلەردىڭ اۋلاسىنان قوراپقا سالىنعان نارەستە تابىلدى

اناسى شامامەن ەكى ساعات بۇرىن ءۇي جاعدايىندا بوسانعان

قاراعاندى قالاسىندا ۇيلەردىڭ اۋلاسىنان جاڭا تۋعان شاقالاق تابىلدى، دەپ حابارلايدى Almaty-akshamy.kz. 

قاراعاندى قالالىق پوليسيا باسقارماسىنا قاراستى ورتالىق پوليسيا بولىمىنە قالاداعى اۋرۋحانالاردىڭ بىرىنە جاڭا تۋعان ەر بالا جەتكىزىلگەنى تۋرالى حابارلاما ءتۇستى. ول كوپقاباتتى ۇيلەردىڭ اۋلاسىنان قوراپ ىشىنەن تابىلعان. وقيعا ورنىنا شۇعىل تۇردە جەدەل-تەرگەۋ توبى باردى. وقيعا كۋاگەرى 21 جاستاعى تۇرعىننىڭ ايتۋىنشا، كەشكىلىك ۋاقىتتا ۇيىنەن شىعىپ بارا جاتقاندا اۋلاداعى ورىندىقتا تۇرعان كارتون قورابتى كورگەن. ىشىندە كورپەشەگە ورالعان ءسابي بولعان. ول نارەستەنى جاقىن ماڭداعى اۋرۋحاناعا جەتكىزگەن. دارىگەرلەردىڭ سوزىنشە، اناسى شامامەن ەكى ساعات بۇرىن ءۇي جاعدايىندا بوسانعان. 

«نارەستە مەرزىمىنەن بۇرىن دۇنيەگە كەلگەندىكتەن، جاعدايى ازىرگە اۋىر. قازىرگى ۋاقىتتا بالا پەريناتالدىق ورتالىقتا دارىگەرلەردىڭ باقىلاۋىندا»، – دەپ حابارلادى قاراعاندى وبلىسى پوليسيا دەپارتامەنتىنىڭ باسپا ءسوز قىزمەتىنەن. 

جەدەل-ىزدەستىرۋ ءىس-شارالارى بارىسىندا پوليسيا قىزمەتكەرلەرى بالانىڭ 23 جاستاعى اناسىن انىقتاپ ۇستادى. جاس انا وبلىس تۇرعىنى ەكەنى بەلگىلى بولدى. اتالعان فاكتى پوليسيادا تىركەلدى. تەرگەۋ امالدارى جۇرگىزىلىپ جاتىر.