13 قىركۇيەك كۇنى قاراعاندىدا ەسىرتكى تارالۋىنا قارسى كۇرەس پەن سالاۋاتتى ءومىر سالتىن ناسيحاتتاۋعا ارنالعان اۋقىمدى اكسيا ءوتتى، دەپ حابارلايدى aqshamnews.kz قاراعاندى وبلىسى پد باسپا ءسوز قىزمەتىنە سىلتەمە جاساپ.
ءىس-شاراعا 1000-نان استام ادام قاتىستى. ولاردىڭ قاتارىندا قاراعاندى قالاسى پوليسيا باسقارماسىنىڭ قىزمەتكەرلەرى، ب.بەيسەنوۆ اتىنداعى قاراعاندى اكادەمياسىنىڭ كۋرسانتتارى، جاستار رەسۋرستىق ورتالىعىنىڭ ەرىكتىلەرى، قوعامدىق كومەكشىلەر، ءتورت جوو (قارمۋ، قەۋ، قارمتۋ، قمۋ) ستۋدەنتتەرى جانە باسقا وقۋ ورىندارىنىڭ وكىلدەرى بولدى. قاتىسۋشىلار ەسىرتكى زاتتارىنىڭ جارناماسى بار زاڭسىز گراففيتيدى ءوشىرۋ جانە ەسىرتكىگە قارسى جادىنامالار مەن بۋكلەتتەر تاراتۋ ءۇشىن بىرىكتى.
اكسيا بارىسىندا قاتىسۋشىلار توپتارعا ءبولىنىپ، ءار توپ ۋچاسكەلىك پوليسيا ينسپەكتورلارىنىڭ باسشىلىعىمەن بەلگىلەنگەن سەكتورلاردا جۇمىس ىستەدى. ءىس-شارانىڭ ناتيجەسىندە قالا اۋماعىنداعى 4200-دەن استام زاڭسىز جازۋلار مەن سۋرەتتەر ءوشىرىلىپ، 3000-نان استام جادىنامالار مەن بۋكلەتتەر تاراتىلدى.
قاراعاندى وبلىسى پوليسيا دەپارتامەنتى باستىعىنىڭ ورىنباسارى، پوليسيا پولكوۆنيگى ءابىل ءابىلديننىڭ ايتۋىنشا، جىل باسىنان بەرى پوليسيا قىزمەتكەرلەرى ەسىرتكى ساتقانى ءۇشىن 71 قىلمىستىق ءىس قوزعاعان، ونىڭ 40-ى گراففيتي ارقىلى جاسالعان جارناماعا قاتىستى. سونىمەن قاتار، ەسىرتكى زاتتارىن تاراتۋمەن اينالىسقان 53 ادام ۇستالعان، ولاردىڭ ىشىندە ەكى جۇكتى ايەل، كوپ بالالى انا، ءتورت ستۋدەنت جانە سەگىز كامەلەتكە تولماعان ءجاسوسپىرىم بولعان.
جىل باسىنان بەرى پوليسيا قىزمەتكەرلەرى 10 000-عا جۋىق ەسىرتكى جارناماسى بار گراففيتيدى وشىرگەن. پولكوۆنيك ءابىلدين گراففيتي ارقىلى ەسىرتكىنى جارنامالاعانى ءۇشىن 3 جىلدان 6 جىلعا دەيىن باس بوستاندىعىنان ايىرۋ جازاسى قاراستىرىلعانىن اتاپ ءوتتى.