جينالعاندار قازا بولعانداردى ءبىر مينۋت ۇنسىزدىكپەن ەسكە الدى
وتكەن عاسىرداعى اشارشىلىق قۇرباندارىنا ەسكەرتكىش قازاقستان تاۋەلسىزدىگىنىڭ 10 جىلدىعى اتىنداعى قاراعاندى ەتنوپارك اۋماعىندا، «انەت بابا» مەشىتىنىڭ جانىندا ورناتىلدى. ول اشتىقتى بەينەلەيتىن جابىق قازاننىڭ بەينەسىن قۇرىپ تۇرعان ەر مەن ايەلدىڭ جاپسارلاس فيگۋرالارى تۇرىندە جاسالعان، دەپ حابارلايدى Almaty-akshamy.kz قازاقپارات-قا سىلتەمە جاساپ. ەسكەرتكىشتىڭ اشىلۋىنا قايعىلى كەزەڭ قۇرباندارىنىڭ ۇرپاقتارى مەن وبلىس اكىمىنىڭ ورىنباسارى ەربول ءالىقۇلوۆ قاتىستى. ءمۇسىننىڭ اۆتورى – ءقازىر گەرمانيادا تۇراتىن جارمۇحامبەت تىلەگەن. شەبەر بۇل ءۇشىن تاريحي وتانىنا ارنايى كەلىپ، مۇندا التى اي تۇرعان.
«وتكەن عاسىردىڭ 30-شى جىلدارىنداعى اشارشىلىق قۇرباندارىنا ەسكەرتكىش ورناتۋ يدەياسى ەۋروپانىڭ ءار تۇكپىرىندە تۇراتىن قازاقتارعا تيەسىلى. گەرمانيادا ءبىزدىڭ «ناۋرىز توبى» اتتى قوعامىمىز بار. ءبارىمىزدى ورتاق تاريح، جۇرەك سىزداتار سەزىم بىرىكتىرەدى. سول جىلدارى ءۇش ميلليوننان استام قازاق قايتىس بولدى، ءبىزدىڭ اتا-بابالارىمىز ەرەكشە قايعىلى كۇندەردى باسىنان وتكەردى. وسكەلەڭ ۇرپاق بۇل تاريحي وقيعا تۋرالى ءبىلۋى ءۇشىن اشارشىلىق تۋرالى ەسكە سالاتىن ەسكەرتكىش ورناتۋدى ءجون كوردىك. مەن بىرنەشە ەسكيزدەر جاسادىم، ءبىز ولاردىڭ اراسىنان وسىنى تاڭدادىق. ەسكەرتكىشتى جاساۋعا شامامەن جارتى جىل ۋاقىتىمدى جۇمسادىم»، – دەيدى ءمۇسىنشى جارمۇحامبەت تىلەگەن.
ءمۇسىنشى وتكەن عاسىرداعى قۋعىن-سۇرگىن ونىڭ دا وتباسىن اينالىپ وتپەگەنىن ايتادى. ونىڭ اكەسىنە ءومىر بويى باسىن امان الىپ قالىپ، اتۋ جازاسىنا ىلىكپەۋ ءۇشىن شەتەل كەزىپ جۇرۋگە تۋرا كەلگەن. سوندىقتان اۆتور وتكەن عاسىر تاريحىنىڭ قايعىلى ساتتەرى جايلى حاباردار. «مەن مۇسىندە سول كۇندەردى ەسكە العان كەزدەگى بارلىق ەموسيالاردى جەتكىزۋگە تىرىستىم. ءمۇسىن گرانيتتەن جاسالعان، تۇعىر دا گرانيتپەن قاپتالعان. بيىكتىگى – 1،2 مەتر»، – دەدى اۆتور. ەسكەرتكىشتىڭ ورنى كەزدەيسوق تاڭدالماعان. كۇن سايىن مەشىتتە دۇعا باعىشتالىپ تۇرادى. ۇيىمداستىرۋشىلار مەشىت جاماعاتى اشتىقتان قايتىس بولعان اتا-بابالارىنىڭ جانى ءۇشىن دە دۇعا ەتكەنىن قالايدى.
«ەشقايسىمىز ماڭگىلىك ەمەسپىز. ءبىز جاستاردى وتكەنمەن بايلانىستىراتىن ۇرپاقپىز. ءبىز بولماساق ولارعا وتكەننىڭ قايعىلى وقيعالارى تۋرالى كىم ايتىپ بەرەدى؟ ال بۇل ەسكەرتكىش ءبىزدىڭ بەيبىت اسپان مەن ءومىرىمىزدى باعالايتىن قايعىلى كۇندەردى ەسكە سالۋى ءتيىس»، – دەپ اتاپ ءوتتى ەۋروپادان كەلگەن قازاق قاۋىمداستىعىنىڭ وكىلى سەرىك تۇرسىن.