وقيعا ورنىنا جەدەل تەرگەۋ توبى جىبەرىلىپ، حابارلاما راستالدى
قاراعاندىدا “ارلان” ارنايى ماقسات قىزمەتكەرلەرى بىرگە تۇراتىن ايەلى مەن 2 جاسار قىزىن كەپىلدە ۇستاعان كۇدىكتىنى ۇستادى، دەپ حابارلايدى Almaty-akshamy.kz.
26 ءساۋىر كۇنى ساعات 12.00 شاماسىندا قاراعاندى قالالىق پوليسيا باسقارماسىنا قاراستى تەمىرجول پوليسيا بولىمىنە قالاداعى كوپ قاباتتى ۇيلەردىڭ بىرىندە جانجال بولىپ جاتقانى تۋرالى حابارلاما ءتۇستى. وقيعا ورنىنا جەدەل تەرگەۋ توبى جىبەرىلىپ، حابارلاما راستالدى.
"بەلگىلى بولعانداي، 24 جاستاعى ازامات 21 جاستاعى بىرگە تۇراتىن جارى مەن 2 جاستاعى قىزىن پىشاقپەن قورقىتىپ، كۇشتەپ ۇستاعان. الايدا ول ەشقانداي شارت قويماعان. قاسكويمەن اراداعى كەلىسسوز ءۇش ساعاتتان استام ۋاقىت جۇرگىزىلدى. ازامات ەشقانداي كەلىسسوزگە كونبەدى. سوندىقتان دا كەپىلدىكتەگى ادامداردىڭ ومىرىنە ءقاۋىپ تونگەندىكتەن، پوليسيا قىزمەتكەرلەرىنە شۇعىل شەشىم قابىلداۋعا تۋرا كەلدى"، – دەدى قاراعاندى وبلىستىق پوليسيا دەپارتامەنتى باستىعىنىڭ ورىنباسارى ءابىل ءابىلدين.
توتەنشە جاعدايلار دەپارتامەنتىنىڭ قىزمەتكەرلەرى پاتەردىڭ ەسىگىن بۇزعان بەتتە، “ارلان” ارنايى ماقساتتىڭ قىزمەتكەرلەرى بىردەن ىشكە كىرىپ، كۇدىكتىنى قولعا ءتۇسىردى. الدىن الا بولجام بويىنشا ازامات ەسىرتكىلىك ماساڭ كۇيىندە بولدى. جابىرلەنۋشى ازاماتشا مەن ونىڭ قىزى ەشقانداي ءجابىر كورگەن جوق. ولار داعدارىس ورتالىعىنا ورنالاستىرىلىپ، پسيحولوگيالىق كومەك كورسەتىلىپ جاتىر.
اتالعان دەرەك بويىنشا قازاقستان رەسپۋبليكاسى قك-نىڭ 126-بابى 2-بولىگى 3-پۋنكتىنە سايكەس قىلمىستىق ءىس تىركەلدى. قازىرگى ۋاقىتتا تەرگەۋ ارەكەتتەرى جۇرگىزىلىپ جاتىر.