قاراعاندى وبلىسىنىڭ پوليسەيلەرى مەن تاكسي جۇرگىزۋشىسى زەينەتكەردى الاياقتاردىڭ ارباۋىنان قۇتقاردى، – دەپ حابارلايدى Polisia.kz.
الاياقتىق قىلمىسىنىڭ الدىن الۋ ماقساتىندا ۇزدىكسىز جۇرگىزىلەتىن پروفيلاكتيكالىق ءىس-شارالارعا قاراماستان، الاياقتاردىڭ ايلا-تاسىلدەرىنە الدانىپ، قوماقتى قارجىلارىنان ايىرىلىپ قالاتىن ازاماتتار از ەمەس.
ال ءتارتىپ ساقشىلارى كۇن سايىن الاياقتىق فاكتىلەرىنىڭ جولىن كەسۋ ماقساتىندا جۇمىس اتقارادى. وتكەن سەنبى كۇنى قاراعاندى وبلىسى اباي اۋدانىنىڭ 71 جاستاعى تۇرعىنى تەلەفونىنا تۇسكەن بەلگىسىز قوڭىراۋعا جاۋاپ بەرەمىن دەپ الاياقتىڭ ارباۋىنا تۇسكەن. “بانكتىڭ قاۋىپسىزدىك قىزمەتىنىڭ مامانىمىن” دەپ قوڭىراۋ سوققان بەلگىسىز بىرەۋ ازاماتشادان 3 ميلليون تەڭگە نەسيەسىن جابۋىن تالاپ ەتكەن. ونداي اقشاسىنىڭ جوق ەكەنىن ايتقان ازاماتشا ولاردىڭ بەرگەن نۇسقاۋىمەن وبلىس ورتالىعىنا كەلىپ، نەسيە راسىمدەپ، الاياقتارعا جىبەرمەك بولعان ەكەن.
تۇرعىنعا تەلەفون سوققاندار وبلىس ورتالىعىنا كەلۋ ءۇشىن تاكسي جالداپ بەرگەن. جولاي ازاماتشانىڭ كۇدىك تۋدىرعان بوگدە بىرەۋمەن تەلەفون ارقىلى اڭگىمەسىن ەستىگەن تاكسي جۇرگىزۋشىسى جەرگىلىكتى جەردىڭ پوليسيا قىزمەتكەرلەرىنە حابار بەرگەن.
كەيىن تاكسي جۇرگىزۋشىسى پوليسيا قىزمەتكەرلەرىنىڭ بەرگەن نۇسقاۋىمەن جول شەتىنە توقتاعان. سول كەزدە الاياقتار تاكسي وعان حابارلاسىپ، نە سەبەپتى توقتاعانىن سۇراعان. جۇرگىزۋشى بىردەن ولارعا بىرنەشە سىلتاۋ ايتىپ، ءتارتىپ ساقشىلارى كەلگەنشە ۋاقىت سوزا تۇرعان. سودان اباي اۋداندىق پوليسيا قىزمەتكەرلەرى سول كولىككە وتىرىپ، زەينەتكەرگە كىمگە اقشا اۋدارايىن دەپ جاتقانىن تۇسىندىرگەن.
تاكسي جۇرگىزۋشىسى زەينەتكەر مەن پوليسيا قىزمەتكەرلەرىن العاشىندا بانككە، كەيىن الاياقتار بەرگەن نۇسقاۋ بويىنشا “اقشا اۋدارۋ” ءۇشىن ساۋدا ۇيىندەگى تەرمينالعا اپارعان، ءبىراق ەشقانداي اقشا اۋدارماعان.
كەيىن ساۋدا ۇيىنە بارعاندا زەينەتكەر الاياقتارعا سول جەردەگى تەرمينالدىڭ جۇمىس ىستەمەي قالعانىن جانە ءوزىنىڭ دەنساۋلىعى ناشارلاپ كەتكەنىن ايتقان. سول كەزدە الاياقتار زەينەتكەرگە داۋىس كوتەرىپ، قورقىتا باستاعان. الايدا ولار زەينەتكەردىڭ جانىندا پوليسيا قىزمەتكەرلەرى بولعانىن سەزبەگەن.