Almaty-akshamy.kz سايتىندا بۇگىن جارىق كورگەن جاڭالىقتار – كۇن كەرۋەنى
الماتى مەن قىتايدىڭ اراسى جاقىنداي تۇسەدى
قالامىزدان قىتايعا دەيىن تۋريستىك پويىز قاتىنايتىن بولدى. قتج «جولاۋشىلار تاسىمالى» اق وكىلدەرى مەن سيان قالاسىنىڭ (قحر) ۇكىمەتىنىڭ دەلەگاسياسى سيان قالاسىنان الماتىعا حالىقارالىق تۋريستىك جولاۋشىلار پويىزىن شىعارۋدى ۇيىمداستىرۋ ماسەلەسىن تالقىلادى. تۋريستىك پويىز ءۇرىمشى – الماتى-2 باعىتىنداعى №103/104 جولاۋشىلار پويىزىنىڭ كەستەسى بويىنشا «قورعاس-التىنكول» شەكارا وتكەلىنەن وتەدى.
بەيجىڭگە اۋە رەيستەرى دە كوبەيەدى
كولىك مينيسترلىگى ازاماتتىق اۆياسيا كوميتەتىنىڭ مالىمەتىنشە، China Southern Airlines اۋە كومپانياسى الماتى-بەيجىڭ اۋە باعىتى بويىنشا رەيستەر سانىن اپتاسىنا 3-تەن 7-گە دەيىن ۇلعايتقان. وسىلايشا، اۋە كومپانياسى وسى باعىت بويىنشا رەيستەردى كۇندەلىكتى نەگىزدە ورىندايتىن بولادى. رەيستەر سىيىمدىلىعى 152-200 ورىندىق «ەيرباس-ا320/ا321» ءتيپتى اۋە كەمەلەرىندە ورىندالادى.
قاي كاسىپ سۇرانىسقا يە بولادى؟
ەڭبەك رەسۋرستارىن دامىتۋ ورتالىعىنىڭ ساراپشىلارى كادرلارعا قاجەتتىلىكتىڭ 2024-2030 جىلدارعا ارنالعان ورتا مەرزىمدى بولجامىن جاسادى، ونىڭ شەڭبەرىندە تاياۋداعى جىلدارى نەعۇرلىم تالاپ ەتىلەتىن ماماندىقتاردىڭ توپ-25 توبى ايقىندالدى. ساراپشىلاردىڭ پىكىرىنشە، ەڭ «قاجەت»: ەسەپشىلەر، كۇزەتشىلەر مەن ينكاسساتورلار، جۇرگىزۋشىلەر، مۇعالىمدەر، ورتا مەديسينالىق قىزمەتكەرلەر جانە مەكتەپكە دەيىنگى ءبىلىم بەرۋ مەكەمەلەرىندەگى تاربيەشىلەر.
الماتىنىڭ اجارى
قالانىڭ سۋبۇرقاقتارى 1 مامىردا ىسكە قوسىلادى. الماتىدا 60 سۋبۇرقاق ىسكە قوسىلادى. قالا بالانسىندا بارلىعى 66 سۋبۇرقاق بار، ونىڭ 6-ى قايتا جاڭعىرتىلىپ جاتىر.
«الماتى – ءبىزدىڭ ورتاق ءۇيىمىز» ناۋقانى اياسىندا سۋبۇرقاقتاردىڭ توستاعاندارى، تۇپتەرى، قابىرعالارى تازارتىلىپ، گرانيت پليتالارىن قالپىنا كەلتىرۋ بويىنشا دايىندىق جۇمىستارى جۇرگىزىلدى. ماماندار سۋبۇرقاقتاردىڭ ساندىك ەلەمەنتتەرىن بويادى، ەلەكتر جابدىقتارى مەن سورعىلارىنا، ەلەكتر ەنەرگياسىنىڭ ينجەنەرلىك جەلىلەرىنە، سۋىق سۋمەن جابدىقتاۋعا جانە كارىزگە ريەۆيزيا جۇرگىزدى.
الاياقتى تاني ءجۇر!
الماتى پوليسيا دەپارتامەنتى وزدەرىن قازاقستاننىڭ ءتارتىپ ساقشىلارى رەتىندە تانىستىراتىن تانىمال الاياقتاردىڭ جۇزدەرى بەينەلەنگەن فوتوكوللاج دايىندادى.
«كۇدىكتىلەر Whatsapp مەسسەندجەرىندە اككاۋنت اشىپ، اۆاتارلارىنا مەملەكەتتىك مەكەمە نەمەسە جەكە ۇيىم باسشىسىنىڭ سۋرەتىن قويىپ، “ق ر ۇقك كەنەتتەن تەكسەرىپ جاتىر” دەگەن سىلتاۋمەن قاراماعىنداعىلارعا ءۇشىنشى تۇلعالاردىڭ ءارتۇرلى شوتتارىنا شۇعىل اقشا اۋدارۋ قاجەتتىلىگى تۋرالى جازادى. وكىنىشكە قاراي، بۇل تىزبەكپەن الدانعان جاعدايلار بار. سوندىقتان ازاماتتاردىڭ الاياقتاردى كوزبەن كورىپ، ولارمەن ديالوگقا تۇسپەۋى وتە ماڭىزدى»، دەدى، الماتى قالالىق پوليسيا دەپارتامەنتى باستىعىنىڭ ورىنباسارى قۋاتبەك ناۋاتوۆ.
قازاقستان وقۋشىلارى بالقان وليمپياداسىنا قاتىسىپ جاتىر
ەلىمىزدىڭ قۇراما كومانداسىنىڭ نامىسىن 6 وقۋشى قورعايدى. ۆارنا قالاسىندا (بولگاريا) ماتەماتيكادان 41ء-شى بالقان وليمپياداسى (BMO) باستالدى. وليمپياداعا 22 ەلدەن 130-دان استام وقۋشى قاتىسادى.
بالقان وليمپياداسىنا قاتىسۋ - اعىمداعى جىلدىڭ 11-24 شىلدە ايىندا بات قالاسىندا (ۇلىبريتانيا) وتەتىن ماتەماتيكادان حالىقارالىق وليمپياداعا (IMO) دايىندالۋ جانە تاجىريبە جيناقتاۋ.
ۆاكسينا ادام ءومىرىن ساقتاي ما؟
جىل سايىن الەمدە ءساۋىردىڭ سوڭىندا دۇنيەجۇزىلىك يممۋنداۋ اپتالىعى وتەدى.
ۆاكسيناسيا – ادام اۋرۋ قوزدىرعىشتارىمەن بايلانىسقا تۇسكەنگە دەيىن اۋرۋدان قورعاۋدىڭ قاراپايىم، ءقاۋىپسىز جانە ءتيىمدى ءادىسى. جۇقپالى اۋرۋلار شەكارادان وڭاي ءوتىپ، ونى يممۋنيتەتى جوق كەز كەلگەن ادام جۇقتىرىپ الۋى مۇمكىن. ۆاكسيناسيا ءوزىڭىزدى جانە اينالاڭىزداعى جانداردى قورعاۋعا مۇمكىندىك بەرەدى. كەز كەلگەن ادام ەكپە سالدىرا الادى. ءبىراق بەلگىلى ءبىر اۋرۋلارى بار ادامدارعا كەيبىر ەكپەلەردى سالۋعا بولمايدى نەمەسە كەيىنىرەك سالدىرۋىنا بولادى. بۇل اۋرۋلارعا: سوزىلمالى اۋرۋلار نەمەسە ەمدەۋ كۋرستارى (مىسالى، حيميوتەراپيا)؛ ۆاكسينا كومپونەنتتەرىنە اللەرگيالىق رەاكسيالار؛ ۆاكسيناسيا كەزىندەگى اۋىر اۋرۋلار جاتادى.
وتەلدە وزگەرىس جوق
ونەركاسىپ جانە قۇرىلىس ءمينيسترى قانات شارلاپايەۆ ەلىمىزدە ۋتيلالىمعا قاتىستى وزگەرىس بولمايتىنىن ايتتى.
«مەملەكەتتە ۋتيلالىمدى وزگەرتۋ ءۇشىن ەشقانداي جوسپار جوق. بۇل ماسەلە ءجيى كوتەرىلىپ جاتىر. ءقازىر كەزدە بۇل باعىتتا قانداي دا ءبىر تۇزەتۋ قاراستىرىلماعان»، - دەدى ق. شارلاپايەۆ.
ءبيدىڭ دە كۇنى بار
بي ونەرىنە ارنالعان اتاۋلى كۇن 1982 جىلى يۋنەسكو-نىڭ حالىقارالىق بي كەڭەسىنىڭ باستاماسىمەن بەكىتىلگەن. مەرەكەنىڭ 29 ساۋىرگە بەلگىلەنۋىنىڭ وزىندىك سەبەبى بار. بۇل كۇنى فرانسۋز بالەت ءبيشىسى، تەورەتيگى، بالەت ونەرىندە رەفورما جاساعان «زاماناۋي ءبيدىڭ اكەسى» جان-جورجە نوۆەررە دۇنيەگە كەلگەن. مەرەكە بۇكىل الەمدە اتاپ وتىلەدى.