تيىمدىلىگىن ارتتىرۋ مەن اسەرىن نىعايتۋ ءۇشىن وڭدەۋ جۇمىستارى جاۋىن-شاشىن جوق كەزدە تۇنگى ۋاقىتتا جۇرگىزىلەدى.
اعاشتاردىڭ قالىپتى جاعدايىن ساقتاۋ جانە زيانكەستەرگە توزىمدىلىگىن ارتتىرۋ ماقساتىندا الماتىدا قالانىڭ جاسىل جەلەگىن بيولوگيالىق وڭدەۋ جۇمىستارى جۇرگىزىلىپ جاتىر، دەپ حابارلايدى Almaty-akshamy.kz
الدىڭعى جىلدارداعى وڭدەۋ جۇمىستارىنىڭ ناتيجەسىنە سايكەس پرەپاراتتاردىڭ تالشىن كۇيە كوبەلەگى، دولانا جاپىراق شيراتقىش كوبەلەگى، راۋشان جاپىراق شيراتقىش كوبەلەك سياقتى پوليفاگ كەمىرگىشتەرگە قارسى اسەرىنىڭ كۇشتى ەكەندىگى انىقتالدى.
بىلتىر جۇرگىزىلگەن جۇمىستىڭ ناتيجەسى بويىنشا پرەپاراتتار كاشتان كوبەلەگى، دولانا جانە راۋشان جاپىراعى جانە ت.ب. سياقتى قورەك تالعامايتىن زيانكەستەرگە قاتتى اسەر ەتكەنى انىقتالدى.
ال مونوفاگ زيانكەستەرگە وڭدەۋدەن كەيىنگى اسەردى كۇشەيتۋ ءۇشىن بىلتىردان باستاپ ءبىرىنشى كەزەڭدە (ۆەگەتاسيا باسىندا) ەمەندەر ءتورت رەت، تەرەكتەر ەكى رەتتەن وڭدەلەتىن بولادى. بۇعان دەيىن ولار ءبىر رەت قانا وڭدەلەتىن، الايدا وڭدەۋ رەتتىلىگى ازدىعىنىڭ ءتيىمسىز ەكەندىگى دالەلدەندى جانە اعاشتاردى ساقتاپ قالۋعا مۇمكىندىك بەرمەيتىنى انىقتالدى
جۇمىس بارىسىندا ادامدارعا قۇستار مەن جانۋارلارعا زيانسىز، كليماتتىق ەرەكشەلىكتەردى ەسكەرە وتىرىپ ق ر اۋماعىندا قولدانۋعا رۇقسات بەرىلگەن سەرتيفيكاتتالعان قاۋىپتىلىگى تومەن كلاسسقا جاتاتىن (پ-4) بيولوگيالىق جانە كەيبىر كەزدەردە حيميالىق پرەپاراتتار قولدانىلادى.
جاپىراق كەمىرگىش جانە زەڭ اۋرۋلارىن قوزدىرعىش زيانكەستەرگە قارسى وڭدەۋ جۇمىستارىمەن 2،3 ملن استام اعاشتى قامتۋ جوسپارلانعان. زيانكەستەر مەن اۋرۋلاردىڭ بيولوگيالىق ەرەكشەلىكتەرىنە قاراي وڭدەۋ جۇمىستارى تۇندە جانە تاڭعى ۋاقىتتا جۇزەگە اسىرىلادى.
بيىل بيولوگيالىق وڭدەۋ جۇمىستارى ادەتتەگىدەي ءتورت كەزەڭمەن جۇرگىزىلەدى: 29 ساۋىردەن 30 مامىرعا دەيىن؛ 10 ماۋسىمنان 10 شىلدەگە دەيىن؛ 20 شىلدەدەن 20 تامىزعا دەيىن جانە 30 تامىزدان 30 قىركۇيەككە دەيىن. وڭدەۋ كەستەسىنە اۋا رايىنا بايلانىستى وزگەرىستەر ەنگىزىلۋى مۇمكىن.