«كىتاپ وقيتىن ۇلت» جوباسى باستالعالى قاراعاندى وبلىسىنىڭ تۇرعىندارى بايقاۋعا ەرەكشە قىزىعۋشىلىق تانىتۋدا. بۇگىنگە دەيىن وبلىس بويىنشا 67 438 ادام تىركەلدى، ونىڭ ىشىندە: 30 534 وقۋشى، 7 862 ستۋدەنت، 17 000 پەداگوگ، 10 987 وتباسى جانە 1 439 مەملەكەتتىك قىزمەتكەر بار.
جوبا قاتىسۋشىلارى اراسىندا شىنايى ينتەللەكتۋالدى باسەكە قالىپتاسىپ، كىتاپ وقۋ داستۇرگە اينالىپ، وڭىردە جاڭا مادەنيەت قالىپتاسۋدا. اۋداندار مەن قالالار اراسىندا وقىلعان كىتاپتار سانى بويىنشا كوشباسشىلار – اباي اۋدانى، تەمىرتاۋ جانە شاحتينسك قالالارى.
ءار قالا مەن اۋدانىندا وقىرمان كلۋبتارى قۇرىلىپ، قاتىسۋشىلار وقىعان شىعارمالاردى تالداپ، بايقاۋعا دايىندىق ۇستىندە. بۇل شارالار وڭىرلىك كىتاپحانالاردىڭ جۇمىسىن جانداندىرىپ، قاتىسۋشىلاردىڭ ءبىلىم دەڭگەيىن كوتەرۋگە جانە سىني ويلاۋ قابىلەتىن دامىتۋعا سەپتىگىن تيگىزەدى.
مىسالى، قارقارالى اۋدانىنىڭ سابىروۆتار وتباسى كەش سايىن وقىعان كىتاپتارىن بىرگە تالقىلاپ، قىزىقتى تۇستارىن ءبولىسۋدى ادەتكە اينالدىرعان: «جوباعا قاتىسقالى بەرى تەلەفونعا مۇلدە ۋاقىت بولمەيتىن بولدىم. بۇرىن اركىم ءوز شارۋاسىمەن جۇرسە، ءقازىر ءبىر شىعارمانىڭ توڭىرەگىندە وي ءبولىسىپ، ءبىر-بىرىمىزدى تىڭدايمىز»، – دەيدى وتباسىنىڭ كىشكەنتاي مۇشەسى سابىر ەركەجان.
ۇستازدار دا جوبادا بەلسەندىلىك تانىتىپ وتىر. م. جۇمابايەۆ اتىنداعى گيمنازيا ءمۇعالىمى التىنبەك بەكزات جاپاتاي ۇلى: «بالالىق شاعىمنان كىتاپ وقۋدى جاقسى كورەتىنمىن. ءبىراق سوڭعى جىلدارى ۋاقىت تاپشىلىعى مەن جۇمىستىڭ كوپتىگىنە بايلانىستى سۇيىكتى ىسىمە كوڭىل بولمەي قالعانمىن. ەندى قايتادان قۇلشىنىس وياندى، كىتاپ وقۋدىڭ قىزىعىنا قايتا دەندەي باستادىم. قىزىعۋشىلىق بولسا، ۋاقىت تابۋعا بولادى ەكەن».
جوبا باستالعاندا مەكتەپ وقۋشىلارى 15 كىتاپتى وقۋعا كوبسىنگەنىمەن، ۋاقىت كەلە بۇل ماقساتقا قول جەتكىزۋدىڭ مۇمكىن ەكەنىنە كوز جەتكىزگەن. ءمامالي توقتامۇرات، «وزات» مامانداندىرىلعان مەكتەپ-ليسەيىنىڭ 10 سىنىپ وقۋشىسى: «تىزىمدەگى كىتاپتاردى بىردەن وقىپ شىعۋ مۇمكىن ەمەس. ءبىراق ماقسات قويىپ، جۇيەلى جوسپار قۇرىپ، از-ازدان ۇزدىكسىز وقىساڭ، ەشتەڭە قول جەتپەيتىن ەمەس. تەاتر ۇيىرمەسىنە قاتىسامىن، وقىعان شىعارمامدى ساحنادا كەيىپكەر رەتىندە ەلەستەتەمىن. بۇل كىتاپتار مەنىڭ ونەرىمە شابىت بەرەدى».
№2 «ءبىلىم-يننوۆاسيا» ليسەي-ينتەرناتىنىڭ وقۋشىسى نۇرتىلەۋ نازەركە: «مەن ءۇشىن بۇل بايقاۋ اقشالاي جۇلدە ەمەس، جان ازىعىنا اينالدى. ءار كىتاپتان العان اسەرىمدى قاعازعا ءتۇسىرىپ، وقىعانىمدى پىسىقتايمىن. كەيىپكەرلەر مەن اۆتورلاردىڭ ويلارى تەرەڭ تولعانىسقا جەتەلەيدى. قازاق، ورىس، اعىلشىن جانە تۇرىك تىلدەرىندە وقي وتىرىپ، كوپ پايدا الدىم».
ە.ا. بوكەتوۆ اتىنداعى ۇلتتىق زەرتتەۋ ۋنيۆەرسيتەتىنىڭ 4-كۋرس ستۋدەنتى ديلارا امانگەلدى قىزى: «ءبىر ماۋسىمدا 15 كىتاپ وقۋ – ءبىلىمدى عانا ەمەس، تىلدىك قابىلەتىمىزدى، سوزدىك قورىمىزدى جانە اناليتيكالىق ويلاۋدى دامىتادى. كىتاپتاردى دەبات فورماتىندا قورعاۋ – ويدى جۇيەلى جەتكىزۋگە، پىكىرتالاس مادەنيەتىن مەڭگەرۋگە جانە سىني ويلاۋدى شىڭداۋعا مۇمكىندىك بەرەدى. مۇنداي جوبا جاستاردىڭ رۋحاني دامۋىنا باعىتتالعان ۇلكەن قادام».
جوبانىڭ نەگىزگى ماقساتى – كىتاپ وقۋ مادەنيەتىن قالىپتاستىرىپ، ءبىلىم مەن رۋحانياتقا دەگەن سۇيىسپەنشىلىكتى ارتتىرۋ. قاراعاندى وبلىسى وسى باستامامەن ەلىمىزدە كىتاپ وقۋ ترەندىن قالىپتاستىرىپ كەلە جاتقان وڭىرگە اينالدى.
جوبانى «Amanat» پارتياسىنىڭ قولداۋىمەن «كىتاپ وقيتىن ۇلت – چيتايۋششايا ناسيا» قوعامدىق قورى جانە قاراعاندى وبلىسى اكىمدىگى جۇزەگە اسىرۋدا. وڭىرلىك دەمەۋشى – «RGB Group» جانەQNP كومپانيالارى.
2025 جىلدىڭ قىركۇيەگىندە «كىتاپ وقيتىن ۇلت» جوباسى پيلوتتىق تۇردە قوستاناي، قاراعاندى وبلىستارى مەن شىمكەنت قالاسىندا باستاۋ العان بولاتىن. قازىرگى تاڭدا ءۇش وڭىردە جوباعا 189 مىڭنان استام ادام قاتىسۋدا، جوبا قورىتىندىسى 2026 جىلعى ساۋىردە شىعارىلادى.