ماڭعىستاۋ وبلىسىندا ەر ادام پوليسيانىڭ كوزىنشە ءوزىن ورتەمەك بولعان. وقيعانىڭ ۆيدەوسى الەۋمەتتىك جەلىدە تارادى، دەپ حابارلايدى Aqshamnews.kz Lada.kz-كە سىلتەمە جاساپ.
وقيعا بەينەۋ اۋىلىنداعى پوليسيا بولىمىنە قاراستى باقىلاۋ-وتكىزۋ پۋنكتىندە بولعان. پوليسيانىڭ مالىمەتىنشە، ەر ادام بۇعان دەيىن تراسسادا پاترۋلدىك قىزمەت توقتاتقان كولىك جۇرگىزۋشىسى بولعان. ول جول قوزعالىسى ەرەجەسىن بۇزعانى ءۇشىن اكىمشىلىك جاۋاپكەرشىلىككە تارتىلعان.
ءبىراز ۋاقىتتان كەيىن ەر ادام ءوزى پوليسيانىڭ باقىلاۋ-وتكىزۋ پۋنكتىنە كەلىپ، ينسپەكتورلاردىڭ ارەكەتىنە كوڭىلى تولماعانىن بىلدىرگەن. سول جەردە ول ۇستىنە بەلگىسىز سۇيىقتىق قۇيىپ، ءوزىن ورتەمەك بولعان.
پوليسيا قىزمەتكەرلەرى ونىڭ ارەكەتىنىڭ الدىن الىپ، ەر ادامدى مەديسينالىق مەكەمەگە جەتكىزدى.
«ءقازىر اتالعان دەرەك بويىنشا قىلمىستىق ءىس قوزعالدى. سوتقا دەيىنگى تەرگەۋ جۇرگىزىلىپ جاتىر، وقيعانىڭ ءمان-جايى انىقتالىپ جاتىر»، — دەپ حابارلادى وبلىستىق پوليسيا دەپارتامەنتى.