«قارا قابىلان: ۆاكاندا جاساسىن!» بلوكباستەرى قازاق تىلىندە كورەرمەنگە جول تارتادى

قازاقستاندا Marvel كينوالەمىنىڭ جانكۇيەرلەرى «قارا قابىلان: ۆاكاندا جاساسىن!» ءفيلمىن قازاق تىلىندە كورە الادى، دەپ حابارلايدى Almaty-akshamy.kz.

مادەنيەت جانە سپورت ءمينيسترى داۋرەن ابايەۆ كينوكارتينانىڭ پرەمەراسىندا ەلىمىز الەمدىك دەڭگەيدەگى ساپالى كونتەنتتى قازاق تىلىندە ۇسىنۋ باعىتىندا ۇلكەن جۇمىس اتقارعانىن اتاپ ءوتتى.

«قازاق تىلىندەگى كينوكارتينالارعا سۇرانىس ارتىپ كەلەدى. حالىققا رەيتينگى جوعارى فيلمدەردى قازاق تىلىندە كورسەتۋ – يدەولوگيالىق تۇرعىدان دا اسا ماڭىزدى. وسى ماقساتتا ءبىز گولليۆۋدتتىق جاڭا تۋىندىلاردى انا تىلىمىزگە دۋبلياجداۋ بويىنشا ارنايى جوبانى قولعا العان ەدىك. تىلگە دەگەن ەڭ ۇلكەن قولداۋ – ونى قولدانۋ. بۇگىندە انا تىلىمىزدە سويلەيتىن جاستار دا، ونى ۇيرەنگىسى كەلەتىن وزگە ۇلت وكىلدەرىنىڭ دە قاتارى ارتىپ كەلەدى. سوندىقتان ءقازاقتىلدى كونتەنتتى بىرگە دامىتايىق»، - دەدى داۋرەن ابايەۆ.

ايتا كەتەيىك، «قارا قابىلان: ۆاكاندا جاساسىن!» - Marvel ستۋدياسىنىڭ قازاق تىلىندە شىعارعان جەتىنشى ءفيلمى.

10 قاراشادان باستاپ 16 جاستان اسقان كورەرمەندەر بلوكباستەردى ەلىمىزدىڭ بارلىق كينوتەاترلارىندا كورە الادى.