كيىز باسۋ ونەرىن مەڭگەرگەندەر الماتىدا حالىقارالىق فەستيۆالدە باس قوستى.
بىرنەشە مىڭ جىل بۇرىن ورتالىق ازيادان باستالعان كيىز باسۋ ونەرى بۇگىندە الەمنىڭ كوپ ەلىنە تاراپ، ۇلكەن كاسىپكە اينالدى. تەكەمەت باسۋ مەن سىرماق تىگۋدى شەتەلدىكتەر ءقازىر دە ۇيرەنىپ ءجۇر، دەپ حابارلايدى Almaty-akshamy.kz «حابار 24» cايتىناا سىلتەمە جاساپ.
كيىز – بۇل نومادتار ويلاپ تاپقان توقىما ەمەس، ماتانىڭ ەڭ كونە ءتۇرى. كوشپەلىلەر ءۇشىن قاسيەتتى مانگە يە. مامانداردىڭ ايتۋىنشا، كەزىندە اق كيىزگە كوتەرىپ حان سايلانعان. ال نارەستەنى جۇقا جانە جىلى كيىز جايالىققا وراعان.
الماتىداعى قاستەيەۆ مۇراجايىندا ەرەكشە كورمە اشىلدى. مۇندا كيىزدەن باسىلعان ءتۇرلى تەكەمەتتەر قويىلعان. ەكسپوزيسيالاردىڭ جارتىسىنان كوبى شەت ەلدىك شەبەرلەردىڭ قولىنان شىققان.
«تەكەمەتتەر ءارتۇرلى ەلدە باسىلعانىمەن ورنەكتىڭ تۇرلەرى مەن پىشىندەرىندە ايىرماشىلىق جوق»، – دەيدى شەبەرلەر. ويتكەنى كيىز باسۋ ونەرى ورتالىق ازيادان تاراعان. تۇركيادان كەلگەن شەبەر ساليح گيرگيچ شەبەرلىك ساعاتىندا موزايكا ادىسىمەن كيىز باسۋدىڭ قىر-سىرىن كورسەتتى.
«قازاق پەن تۇرىكتەردىڭ كيىز باسۋ داستۇرىندە ايتارلىقتاي ايىرماشىلىق جوق. ءبىز تەك سىرماق جاسامايمىز. كيىز باسۋمەن عانا اينالىسامىز. بىزدە كيىز باسۋ اتادان بالاعا مۇرا بولىپ كەلەدى. اتام 1965 جىلى باستاعان كاسىپتى اكەم جالعاستىرىپ، ءقازىر مەن وسى ءداستۇردى دامىتىپ ءجۇرمىن»، - دەيدى تۇركيادان كەلگەن كيىز باسۋ شەبەرى ساليح گيرگيچ.
كيىز باسۋشى شەبەرلەردىڭ حالىقارالىق فەستيۆالى ەلىمىزدە ءبىرىنشى رەت ۇيىمداستىرىلىپ وتىر. مادەني مۇرانى دارىپتەۋشىلەر ورتالىق ازيا ەلدەرىنەن وزگە تۇركيا، اقش، ۆەنگريا، ششۆەيساريا، گوللانديا، انگليا جانە فرانسيادان كەلگەن.
«قازاقتاردا كيىز باسۋ ايەلدەردىڭ ءىسى. ەركەكتەر تەك اۋىر جۇمىستارعا كومەكتەسەدى. ال تۇركيا مەن يراندا كيىز باسۋمەن كوبىنەسە كاسىپ رەتىندە ەركەكتەر اينالىسادى. ودان كەيىن كوپتەگەن ەل قويدىڭ ءجۇنىن قالىپقا قولمەن جايادى. تۇرىكتەر ارنايى تىرمانى پايدالانادى. ال ويۋلار قولمەن قويىلادى»، - دەيدى قازاقستان قولونەرشىلەر وداعىنىڭ ءتورايىمى ايجان بەكقۇلوۆا.
كيىز باسۋشىلاردى ءبىر جەرگە توعىستىرعان حالىقارالىق فەستيۆال ءبىر اپتاعا جوسپارلانعان. الداعى كۇندەرى قولونەرشىلەر تاجىريبە الماسىپ، شەبەرلىك ساباقتارىن وتكىزەدى.