الماتىنىڭ بىرنەشە اۋدانىندا اعاش وتىرعىزىلدى
19 ناۋرىز – جاڭارۋ كۇنى. جاڭا فورماتتا تويلانا باستاعان مەرەكەنىڭ التىنشى كۇنىن الماتىلىقتار اعاش وتىرعىزۋ جۇمىستارىمەن جالعاستىردى. بۇل كۇنى الماتىنىڭ بىرنەشە اۋداندارىندا اعاش ەگىلدى، دەپ حابارلايدى اlmaty-akshamy.kz.
جاڭارۋ كۇنىنە وراي ۇيىمداستىرىلعان ءىس-شارانىڭ ءبىرى – ناۋرىزباي اۋدانىنداعى «شۇعىلا» ىقشاماۋدانىنداعى №200 مەكتەپ-گيمنازيادا ءوتتى. مەكتەپ ديرەكتورى اينۇر نۇرىم قىزى ءوزى وقۋشىلارمەن بىرگە ءجۇرىپ، مەكتەپ اۋلاسىنا 50 ءتۇپ شىرشا، 50 ءتۇپ تۇيا اعاشتارى وتىرعىزدى.
– تۋعان جەرگە، وتانعا دەگەن سۇيىسپەنشىلىكتەرىن ارتتىرۋعا، ەكولوگيالىق ءبىلىمدى قالىپتاستىرۋ مەن تابيعاتتى قورعاۋعا باۋلۋدى ماقسات ەتەتىن شارانىڭ جاس ۇرپاققا بەرەرى مول. بۇل شاراعا مەكتەپ ۇجىمى ءبىر كىسىدەي اتسالىسىپ، ساۋابى مول ىستە بەلسەندىلىك تانىتتى، – دەيدى ديرەكتوردىڭ تاربيە ءىسى جونىندەگى ورىنباسارى اقمارال سالقىنبەكوۆا.
شارا بارىسىندا «قارا جورعا» بيىنەن فلەشموب، بىرنەشە سپورت تۇرلەرىنەن جارىس ءوتتى. يگىلىكتى ىسكە اتسالىسقاندار ۇيىمداستىرۋشىلار ازىرلەگەن باۋىرساق پەن ناۋرىز كوجەدەن ءدام تاتىپ، ۇيلەرىنە ارقا-جارقا كوڭىل-كۇيمەن تارقاستى.
