جەلتوقسان ايىنىڭ العاشقى ونكۇندىگىندە ەلىمىزدىڭ باسىم بولىگىندە قار جاۋادى. «قازگيدرومەت» رمك وسىنداي مالىمەت ۇسىندى، دەپ حابارلايدى اlmaty-akshamy.kz.
«قازاقستاننىڭ باسىم بولىگىندە قار جامىلعىسى جەلتوقساننىڭ ءبىرىنشى ونكۇندىگىنىڭ سوڭىندا، ال رەسپۋبليكانىڭ وڭتۇستىك-باتىسىندا، وڭتۇستىگىندە جانە وڭتۇستىك-شىعىسىندا ايدىڭ ەكىنشى جارتىسىندا تۇسەدى دەپ بولجانۋدا. جەلتوقسان ايىنىڭ باسىندا قازاقستاننىڭ باسىم بولىگىندە جاۋىن-شاشىن (جاڭبىر، قار) جاۋادى. سونداي-اق تۇمان، كوكتايعاق قۇبىلىستارى بايقالادى دەپ كۇتىلەدى. ال سولتۇستىك وڭىرلەردە ۇيىتقىعان جەل مەن جاياۋ بۇرقاسىن سوعۋى ىقتيمال»، - دەپ اتاپ وتەدى قازگيدرومەتتەن.
مەكەمە مالىمەتىنشە، جەلتوقساننىڭ 5ء-ى كۇنىنەن كەيىن وڭتۇستىك ايماقتاردى قوسپاعاندا ەلدىڭ باسىم بولىگىندە ايازدى اۋا رايى كۇتىلەدى. قار جاۋىپ، بۇرقاسىندى جەل كۇشەيەدى. تەرمومەتر باعانى تۇنگى ۋاقىتتا -10-20°س-قا، كۇندىز-3-10°س-قا دەيىن تومەندەيدى دەپ بولجانادى.
كۇز نەگە جىلى بولدى؟
قازاقستان اۋماعىنا ءتان ەمەس جىلى كۇز بەن قىستىڭ كەش كەلۋى باتىس جانە وڭتۇستىك سيكلونداردىڭ ءجيى بولۋىمەن، سونداي-اق يران مەن جەرورتا تەڭىزى اۋداندارىنان جىلى اۋا ماسسالارىنىڭ كەلۋىمەن بايلانىستى. وسىعان وراي قازاقستان اۋماعىنداعى تەمپەراتۋرالىق فون كليماتتىق نورمادان 3-10° س-قا جوعارى تىركەلدى. مەتەوباقىلاۋ تاريحىندا وسى جىلدىڭ قاراشا ايى وتە جىلى بولدى. جىلى اۋا-رايىنىڭ جوعارعى شەگى 17-18 قاراشا ارالىعىندا بايقالدى. سوڭعى رەت اۋا رايى جىلى قاراشا ايى 2010 جىلى تىركەلگەن ەدى. سول كەزدە اۋا تەمپەراتۋراسى نورمادان 2-7° س-قا اۋىتقىدى.
مۇنداي قۇبىلىس ەل تاريحىندا قاشان بايقالدى؟
كوپجىلدىق باقىلاۋلارعا سايكەس، استانا قالاسىندا قار جامىلعىسىنىڭ ەڭ كەش ءتۇسۋى 1967 جىلعى 15 جەلتوقساندا (56 جىل بۇرىن) جانە 2008 جىلعى 14 جەلتوقساندا (15 جىل بۇرىن) تىركەلدى.
تاريحي دەرەكتەرگە سۇيەنسەك، ەلوردادا قار جامىلعىسىنىڭ ەرتە ءتۇسۋى – 10 قازان، ورتاشا ءتۇسۋى – 10 قاراشا، ال كەش ءتۇسۋى 15 جەلتوقساندا بولدى. سوڭعى ءۇش جىلدا – 2020، 2021، 2022 جىلدارى قاراشانىڭ ءبىرىنشى ونكۇندىگىنىڭ سوڭىندا، ەكىنشى ونكۇندىگىنىڭ باسىندا تۇراقتى قار جامىلعىسى تىركەلىپ، ورتاشا قالىڭدىعى 8-13 سم بولدى.