2024 جىلدىڭ 17 جەلتوقسانىنان 2025 جىلدىڭ 12 قاڭتارىنا دەيىن الماتى سيركىندە جاڭا جىلدىق ەرتەگى — «قار پاتشايىمى» قويىلىمى وتەدى، دەپ حابارلايدى aqshamnews.kz
بۇل مەرەكەلىك قويىلىمدا عاجايىپتار مەن مەيىرىمدىلىككە تولى سيقىرلى وقيعا كورەرمەندەردى باۋراپ الادى. قويىلىمنىڭ باستى كەيىپكەرلەرى دجونيك پەن كاميللا سيقىرلى وقيعالار الەمىنە تاپ بولادى. قازاق مەملەكەتتىك سيركىنىڭ رەجيسسەرلىك-قويىلىم توبى بۇل جاڭا نۇسقاداعى كونە ەرتەگىنى زاماناۋي سيرك تىلىندە ۇسىنادى.
قويىلىمدا بەلگىلى كايا مەن گەردا كەيىپكەرلەرىنىڭ ورنىنا دجونيك پەن كاميللا شىتىرمان وقيعالاردان وتەدى. سيقىرشىلار، سونداي-اق كۇلكى قورعاۋشىسى، كوكتەم، جاز، كۇز باستى كەيىپكەرلەرگە قار پاتشايىمىنىڭ مۇزدى جۇرەگىن ەرىتۋگە كومەكتەسەدى. ولار جاڭا جىلدىڭ قوجايىنى بولاتىن قار پاتشايىمىنا مىندەتتى تۇردە بالالىق قۋانىش پەن مەرەكەنى ەسكە سالۋى ءتيىس.
قازاق مەملەكەتتىك سيركىنىڭ باس قويۋشى رەجيسسەرى مارينا رەدكو اتاپ وتكەندەي، «دجونيك پەن كاميللا ءبىزدىڭ كورەرمەندەرگە ۇناعانى سونشالىقتى – ولار جاڭا جىلدىق قويىلىمنىڭ باستى كەيىپكەرلەرى بولىپ وتىر. بۇل كەيىپكەرلەر بىزگە بالالىق شاعىمىزدا ەرتەگىلەر الەمىنە ساياحات جاساعان ساتتەردى ەسكە تۇسىرەدى». سونىمەن قاتار، قويىلىم ءۇشىن ارنايى جاڭا سيرك نومىرلەرى، ەكسكليۋزيۆتى كوستيۋمدەر مەن رەكۆيزيتتەر دايىندالىپ، ۇلكەن لازەرلىك شوۋ ۇيىمداستىرىلادى.
مەرەكەلىك باعدارلامادا يۋ.نيكۋلين اتىنداعى ماسكەۋ سيركىنىڭ ارتىستەرى وزدەرىنىڭ ۇيرەتىلگەن جانۋارلارىمەن، كۇن شۋاقتى يسپانيادان كەلگەن كۇلكىلى كلوۋن جانە الماتى سيركىنىڭ ۇزدىك ارتىستەرى قاتىسادى. بۇعان قوسا، حالىقارالىق سيرك ونەر فەستيۆالىنىڭ جەڭىمپازدارى مەن لاۋرەاتتارى — اۋە گيمناستتارى، ەكۆيليبريستەر، اكروباتتار جانە «نوماد» كاسكادەرلەرى ءوز ونەرلەرىن كورسەتەدى.
قويىلىمنىڭ تۇساۋكەسەرى 17 جەلتوقسان كۇنى، ساعات 12:00-دە قازاقستان رەسپۋبليكاسىنىڭ تاۋەلسىزدىك كۇنىنە وراي وتەدى. بۇل قويىلىم قالالىق ءماسليحات دەپۋتاتتارىمەن بىرلەسىپ، حالىقتىڭ از قامتىلعان جانە كوپ بالالى وتباسىلاردىڭ بالالارىنا، ارداگەرلەرگە جانە قارتتارعا ارنالادى. قويىلىمنىڭ ۇزاقتىعى 2 ساعاتتى قۇرايدى، ال انتراكت 15 مينۋتقا سوزىلادى.