بالىق اۋلاماق بولعان بالىقشى مۇزعا شىققان.
2024 جىلعى 19 اقپاندا ساعات 12:12-دە الماتى وبلىسى تجد كەزەكشى بولىمىنە قونايەۆ قالاسى قاپشاعاي سۋ قويماسىندا مۇز جارىلىپ، مۇز ۇستىندە ادام قالىپ قويعانى تۋرالى حابارلاما كەلىپ ءتۇستى.
وقيعا ورنىنا الماتى وبلىسى تجد قىزمەتكەرلەرى دەرەۋ باردى.
قۇتقارۋشىلار وقيعا ورنىنا كەلگەننەن كەيىن بۇل ازاماتتىڭ بالىق اۋلاۋ ءۇشىن مۇزعا شىققانى انىقتالدى. الايدا، مۇز جاعادان ءبولىنىپ، بالىقشى وزدىگىنەن جاعاعا ورالا الماعان. قۇتقارۋشىلار اۆاريالىق-قۇتقارۋ جۇمىستارىن جۇرگىزىپ، ازامات ەۆاكۋاسيالاندى.
بۇل ازامات ق ر اقبتك-نىڭ 412-بابىنا سايكەس سۋ ايدىندارىندا (مۇزدا) قاۋىپسىزدىك ەرەجەلەرىن ساقتاماعانى ءۇشىن اكىمشىلىك جاۋاپكەرشىلىككە تارتىلدى.
قالىپتاسقان تۇراقسىز اۋا-رايىنا بايلانىستى جانە جازاتايىم وقيعالاردىڭ الدىن الۋ، جۇقا مۇزدا جاراقات الۋ مەن ادام ءولىمىنىڭ الدىن الۋ ماقساتىندا الماتى وبلىسىنىڭ تجد سۋ ايدىندارىندا قاۋىپسىزدىك ەرەجەلەرىن ساقتاۋعا جانە جۇقا مۇزعا شىعۋدان باس تارتۋعا شاقىرادى.
ەستەرىڭىزگە سالا كەتەيىك، وسىعان ۇقساس جاعداي وسىدان ەكى كۇن بۇرىن دا بولعان ەدى. بۇل تۋرالى بىرەر كۇن بۇرىن سايتىمىزدا حابارلاعان بولاتىنبىز.