ولار ءقازىر شارشى مەترىنە ورتا ەسەپپەن 300 000 تەڭگە سۇراپ وتىرعان كورىنەدى
ريەلتورلاردىڭ ايتۋىنشا، قاپشاعاي قالاسىندا باسپانا باعاسى بىردەن 40 پايىزعا قىمباتتاپ كەتتى – دەپ حابارلادى Almaty-akshamy.kz.
31-تەلەارنانىڭ «ينفورمبيۋرو» جاڭالىقتار باعدارلاماسىندا ايتىلعانداي، قاپشاعايدا جىلجىمايتىن مۇلىك نارىعى كۇرت جاندانعان. قالانىڭ وبلىس ورتالىعى بولادى دەگەن حاباردان كەيىن ىسكەر ساتۋشىلار پاتەر باعاسىن بىردەن كوتەرىپ جىبەرگەن. ريەلتورلاردىڭ ايتۋىنشا، باسپانا 40 پايىزعا قىمباتتاعان. ولار ءقازىر شارشى مەترىنە ورتا ەسەپپەن 300 000 تەڭگە سۇراپ وتىرعان كورىنەدى.
بىرنەشە كۇننەن بەرى جارنامالاردا باعا وزگەرىپ جاتىر. بۇرىن «ءبىر بولمەلى پاتەر» ءۇشىن ساتۋشىلار جەتى ميلليون تەڭگە سۇراسا، ءقازىر باستاپقى باعا 11 ميلليون تەڭگەگە جەتتى. ءزۇلفيا مۇساگيموۆانىڭ جولى بولدى: ول دۇربەلەڭگە دەيىن ءۇش بولمەلى پاتەر ساتىپ الدى.
«ءبىر اي بۇرىن 12 ميلليونعا پاتەر ساتىپ الدىم. پاتەردى جوندەۋگە ءۇش ميلليون كەتتى. ال ەندى ءقازىر ساتقىم كەلسە، بۇل پاتەرگە 20 ميلليونداي سۇراي الامىن»، – دەيدى قاپشاعاي قالاسىنىڭ تۇرعىنى ءزۇلفيا مۇساگيموۆا.
ءبىر قىزىعى، جىلجىمايتىن مۇلىككە نەگىزىنەن تالدىقورعان، قاسكەلەڭ جانە شىمكەنت قالالارىنىڭ تۇرعىندارى قىزىعۋشىلىق تانىتادى. جالعا بەرۋ نارىعىندا جاعداي باسقاشا. باعالارى بۇرىنعىداي. شىن مانىندە، سۇرانىس ۇسىنىستان الدەقايدا اسىپ تۇسەدى.
«سونىمەن قاتار 60 مىڭدىق ءبىر بولمەلى پاتەر قۇنى وتە سيرەك كەزدەسەدى. ءبىر بولمەلى پاتەردى جالعا الۋ قۇنى 80 جانە 100 مىڭنان. ەكى بولمەلى پاتەر 125 مىڭ، ءۇش بولمەلى پاتەر 150 مىڭ. ال ءقازىر ونداي پاتەردى قاپشاعايدان تابا المايسىز. مۇنداي باعالار بىزدە شامامەن ءۇش-تورت اي بۇرىن قالىپتاسقان. نەگە ەكەنى ءالى انىق ەمەس، ءبىراق بارلىعى سۇرانىسقا بايلانىستى. جالپى جالدامالى باسپانا جەتكىلىكسىز»، – دەيدى جىلجىمايتىن مۇلىك اگەنتتىگىنىڭ ديرەكتورى الما قادىربايەۆا.
جاڭا وبلىس ورتالىعىنا تۇرعىندار لەگى بۇرىنعىدان دا ارتا تۇسپەك. سوندىقتان دا 40 پايىزعا قىمباتتاعان باسپانا مەن جەر قۇنى ءالى شارىقتاۋ شەگىنە جەتكەن جوق دەپ بولجاۋعا بولادى.