قازاقستان فۋتبول فەدەراسياسى فۋتزالدان ۇلتتىق قۇرامانىڭ باس باپكەرى پاۋلو ريكاردو فيگەيرو سيلۆامەن (كاكا) كەلىسىمشارتتىڭ اياقتالعانىن مالىمدەدى، - دەپ حابارلايدى Aqshamnews.kz
«برازيليالىق مامان 2018 جىلدان بەرى ەل قۇراماسىن جاتتىقتىرىپ، وسى جىلدار ىشىندە وتاندىق فۋتزالدىڭ دامۋىنا زور ۇلەس قوستى. ونىڭ باسشىلىعىمەن كوماندا ەۋروپا مەن الەمنىڭ ۇزدىك قۇرامالارىنىڭ قاتارىنا قوسىلىپ، ويىنى ءستيلى مەن ءتارتىبى، سونداي-اق جۇمىستى ۇيىمداستىرۋ بويىنشا جاڭا دەڭگەيگە كوتەرىلدى.
2021 جىلى ليتۆادا وتكەن الەم چەمپيوناتىندا قازاقستان تاريحتا العاش رەت جارتىلاي فينالعا شىعىپ، ءتورتىنشى ورىن الدى. بۇل جەتىستىك ەلىمىزدىڭ فۋتزال تاريحىنداعى ەڭ ايشىقتى جەتىستىك بولدى.
2022 جىلى ەۋروپا چەمپيوناتىندا پلەي-وفف كەزەڭىنە شىقسا، ال الەم چەمپيوناتىنىڭ ىرىكتەۋىن سەنىمدى ءوتتى. وزبەكستاندا وتكەن دودادا قازاقستان قايتادان ۇزدىك سەگىز قۇرامانىڭ قاتارىنان كورىندى.
كاكا باس باپكەر بولعان كەزەڭدە قازاقستان قۇراماسى الەمدىك رەيتينگتە رەكوردتىق كورسەتكىشكە جەتىپ، حالىقارالىق مويىنداۋعا يە بولدى. بۇعان قوسا، كاكا بىرنەشە رەت «جىلدىڭ ۇزدىك باپكەرى» اتاعىنا ۇمىتكەرلەر قاتارىنا ەندى.
سپورتتاعى ەڭبەگى مەن قازاقستان فۋتزالىنىڭ دامۋىنا قوسقان ۇلەسى ءۇشىن پاۋلو ريكاردو كاكا مەملەكەت باسشىسى قاسىم-جومارت توقايەۆتىڭ قولىنان II دارەجەلى «دوستىق» وردەنىمەن ماراپاتتالدى.
قازاقستان فۋتبول فەدەراسياسى كاكاعا كوپجىلدىق ەڭبەگى، كاسىبيلىگى مەن ءوز ىسىنە دەگەن ادالدىعى ءۇشىن شىن جۇرەكتەن العىس بىلدىرەدى. ونىڭ باسشىلىعىمەن ۇلتتىق قۇرامانىڭ ويىنى مىنەز بەن تۇراقتىلىقتىڭ ۇلگىسىنە اينالىپ، ناعىز كوماندالىق رۋحتى كورسەتتى. كاكا ەسىمى وتاندىق فۋتزال تاريحىندا ماڭگى ساقتالادى»، - دەلىنگەن اقپاراتتا.