قاڭتار قۇرباندارىنا ارنالعان «تاعزىم» مەموريالدىق كەشەنى «تۇران» ۋنيۆەرسيتەتىنە جاقىن ماڭنان ورىن تەپكەن. سوندىقتان وندا وقيتىن جاستار مەن ءدارىس بەرەتىن وقىتۋشىلار بۇل ساۋلەت كەشەنىنىڭ ءمان-ماعىناسىن جاقسى تۇسىنەتىنى ءسوزسىز.
اتالعان ۋنيۆەردىڭ وقىتۋشىسى، فيلولوگيا عىلىمىنىڭ كانديداتى، قاۋىمداستىرىلعان پروفەسسور گۇلجان تولەكوۆا ەل ىشىندە دۇربەلەڭ تۋعان كۇنى جۇمىس ورنىندا تۇسكە دەيىن عانا وتىرىپ، تۇستەن كەيىن ۇيىنە قايتقان بولاتىن. ول كەزدە ستۋدەنتتەر قىسقى دەمالىسقا تاراپ كەتكەن. تۇسىنىكسىز جاعدايلار كەشكە باستالدى دەيدى ول.
– قاس قارايعان شاقتا ۇيگە اۋەلى بالالارىم، ودان جولداسىم كەلدى جۇمىستان. «كوشەدەگى احۋال ءبىرتۇرلى، كولىكتەر بىر-بىرىنە باعىنباي، كەپتەلىسكە دە قاراماي، ءبىر-بىرىن باسىپ وزىپ جاتىر. كوشەدەن ورتەنىپ جاتقان ماشينالاردى دا كوردىك» دەدى ولار مازاسىز كوڭىلمەن. ەرتەڭىنە كۇيەۋىم ەكەۋمىز نان الۋعا شىقتىق. ءبىراز جەر جۇردىك. ەشبىر دۇكەننەن نان تاپپادىق. جولاي كەزىككەن، تۇر-الپەتى بوتەن كورىنەتىن ادامداردىڭ ءجۇزى تىم سۋىق كورىندى. ءبارى سۋىت جۇرگەندەي. كوزدەرى الاق-جۇلاق ەتەدى. كوپقاباتتى ۇيلەردىڭ ءبىرىنشى قاباتىندا ورنالاسقان بانك، دۇكەن، ءدارىحانالاردىڭ تونالعانىن كوردىك. اينالا نان ىزدەگەن اعايىن. سول كەزدە ناندى دۇكەننىڭ ىشىنەن ءپىسىرىپ ساتىپ جاتتى. قولىمىزدا بانك كارتاسى، ءبىراق تاماق ساتىپ الاتىن اقشامىز جوق. بۇل ءبىر قيىن ساتتەر بولدى. سول مەزەتتەردە ورىن العان ەل ىشىندەگى دۇربەلەڭدە ءبىزدىڭ قالاعا مۇلدە بوتەن ادامدار كىرىپ كەتكەندەي اسەردە بولدىم، ونى مەن سوزبەن ايتىپ جەتكىزە المايمىن، – دەيدى گۇلجان قاجىمۇرات قىزى وتكەن كۇندەردى ەسكە الىپ.
ەرتەڭىنە دە سىرتقا شىعۋىنا تۋرا كەلدى. سەبەبى، ءۇش-تورت كۇن بۇرىن سوعىمعا تاپسىرىس بەرىپ قويعان بولاتىن. تەرەزەدەن ءۇڭىلىپ قاراپ ەدى، سىرتتا الدەكىمدەردى تورىپ جۇرگەن ماشينالاردى كوزى شالدى. سوندا دا اۋلاعا شىقتى. اۋلادا ءۇش-تورت بالا الاڭسىز ويناپ ءجۇرىپتى. ءبىر كەزدە تۇتقيىلدان اتىس باستالىپ كەتكەندە، سىلەيىپ تۇردى دا قالدى. ويىن بالالارىنىڭ الدىنان ءبىر جىگىت قاشا جونەلىپ، ونى پوليسيا وكىلدەرى قۋىپ كەتكەن. بەيبىت ومىردە وسىنداي اتىستى كورەم دەپ كىم ويلاسىن، گۇلجان قاجىمۇرات قىزى اۋرۋحاناعا ءتۇسىپ قالادى.
كەي-كەيدە «تاعزىم» مەموريالدىق كەشەنىنىڭ جانىنان وتە قالعاندا، سول كۇندەر ساناسىندا جاڭعىرىپ تۇرىپ الاتىنى بار. سول ءبىر ساتتەر كوز الدىنان كينونىڭ لەنتاسىنداي وتە باستايدى. كەيىن وسىناۋ سىن ساعاتتا اسكەري بورىشىن وتەپ جۇرگەن جاس ساربازداردىڭ دا الماتى تىنىشتىعىن، بەيبىت تۇرعىنداردىڭ ءومىرىن قورعاۋعا اتسالىسقانىن ەستىپ، انا رەتىندە ءتىپتى تولقىدى.
ءقازىر ستۋدەنتتەرىنە قازاق حالقىنىڭ سان عاسىرلىق ارمانى بولعان قاسيەتتى تاۋەلسىزدىگىمىزگە قاتەر توندىرگەن قاڭتار وقيعاسى تۋرالى ءجيى ايتىپ، ولاردى بەيبىت ءومىردىڭ ءقادىرىن بىلۋگە شاقىرىپ وتىراتىنى بار. ال «تاعزىم» مەموريالىنىڭ اشىلۋىن ءبىزدىڭ ەل باسىنا كۇن تۋعان اۋىر كۇندەردە قازا تاپقان وتانشىل ازاماتتارىمىزعا دەگەن ۇلكەن قۇرمەت دەپ بىلەدى.