قاڭتار وقيعاسى تۋرالى دەرەكتى فيلم جارىق كوردى

دەرەكتى ءفيلمدى دايىنداۋعا 1 اپتا ۋاقىت جۇمسالعان.

بۇگىن ەلوردادا قاڭتار قاسىرەتىنە ارنالعان «تراگيچەسكيي يانۆار. كاك ەتو بىلو» اتتى دەرەكتى ءفيلمنىڭ تانىستىرىلىمى ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«حابار» اگەنتتىگى تۇسىرگەن دەرەكتى فيلمدە ەلدە بولعان جاپپاي تارتىپسىزدىكتەردىڭ حرونولوگياسى باياندالادى. 20 مينۋتقا سوزىلاتىن ءفيلمنىڭ اۆتورى - «حابار» اگەنتتىگىنىڭ ءتىلشىسى ايگۇل ءادىلوۆا. ونىڭ ايتۋىنشا، دەرەكتى ءفيلمدى دايىنداۋعا 1 اپتا ۋاقىت جۇمسالعان جانە 7 مامان ەڭبەك ەتكەن.

«قاڭتار وقيعاسى قازاقستاندىقتار ءۇشىن كۇتپەگەن جاعداي بولدى جانە وقىس وقيعا ەلمەن قاتار بۇكىل الەم نازارىن وزىنە اۋدارتتى. دەرەكتى ءفيلمدى تۇسىرۋدەگى ماقساتىمىز – قاڭتار وقيعاسىنىڭ قالاي بولعانىن تىزبەكتەپ كورسەتۋ. ياعني 1 قاڭتاردا جاڭاوزەندەگى بەيبىت شەرۋدەن باستاپ جاپپاي تارتىپسىزدىكتەردىڭ حرونولوگياسى ۇسىنىلادى. سونداي-اق، فيلم ارقىلى حالىقتىڭ اۋىزبىرشىلىگى مەن تۇتاستىعىن دارىپتەيمىز. سەبەبى دەر كەزىندە بىرلىككە كەلمەگەندە ونىڭ سوڭى نەمەن اياقتالاتىنىن ەشكىم بىلمەس ەدى. ارينە، ودان بولەك مەملەكەت باسشىسىنىڭ شۇعىل ءارى سەنىمدى شەشىمدەرى دە ارقاۋ بولدى»، - دەدى «حابار» اگەنتتىگىنىڭ باسقارما ءتوراعاسى ەرلان بەكحوجين.

ونىڭ ايتۋىنشا، ەلىمىز ءۇشىن قاڭتار وقيعا ۇلكەن ساباق جانە ونى تەرەڭ زەرتتەپ، تالداۋ جاساۋ كەرەك. ايتا كەتەيىك، اتالعان دەرەكتى ءفيلمدى كورەرمەندەر بۇگىن «حابار» اگەنتتىگىنەن كەشكى ساعات 20:30-دا كورە الادى.