الماتى اكىمى باقىتجان ساعىنتايەۆ جۇمىس ساپارى كەزىندە "جەدەل جاردەم" قىزمەتىنىڭ جۇمىسىمەن تانىسىپ، ۇجىمىمەن كەزدەستى، دەپ حابارلايدى اlmaty-akshamy.kz
قالا اكىمى "جەدەل جاردەم" بريگادالارىنا شاقىرۋلاردى قابىلداۋ جانە بەرۋ جۇزەگە اسىرىلاتىن اقپاراتتىق-ديسپەچەرلىك ءبولىمنىڭ جۇمىسىمەن تانىستى. قىزمەت ۇجىمىمەن كەزدەسۋدە باقىتجان ساعىنتايەۆ دامۋ پەرسپەكتيۆالارىن، قىزمەتكەرلەر مەن جالپى ۇيىمنىڭ وزەكتى ماسەلەلەرىن شەشۋدى تالقىلادى، سونداي-اق قاڭتار ايىنداعى وقيعالار كەزىندە زارداپ شەككەندەرگە كومەك كورسەتكەندەرى ءۇشىن العىسىن ءبىلدىردى.
"جەدەل جاردەم" قىزمەتكەرلەرى وزدەرىنىڭ كاسىبي مىندەتتەرىن ورىنداۋدا باتىلدىق تانىتتى. تەرروريستىك اكتىلەر بارىسىندا 5 قىزمەتكەر زارداپ شەكتى، ولاردىڭ تورتەۋىنىڭ دەنساۋلىقتارىنا جەڭىل دارەجەدە زيان كەلسە، بىرەۋىنىڭ دەنساۋلىعى ورتاشا اۋىرلىقتا جاپا شەكتى. سول كۇندەرى بارلىعى 2160 "جەدەل جاردەم" قىزمەتكەرلەرى جۇمىس ىستەدى.
تارتىپسىزدىك بارىسىندا زارداپ شەككەندەرگە بارعان كەزدە 32 ارنايى اۆتوكولىك زاقىمداندى. بۇگىندە مەسەناتتار جەدەل جاردەم قىزمەتىنە 16 جەدەل جاردەم كولىگىن تاپسىردى.
باقىتجان ساعىنتايەۆ قايعىلى وقيعا كۇندەرى جۇمىس ىستەگەن بارلىق قىزمەتكەرلەر ماتەريالدىق كومەك الاتىنىنا سەندىردى. سونداي-اق، قالا "جەدەل جاردەم" قىزمەتىن قاجەتتى تەحنيكامەن جانە جابدىقتارمەن قامتاماسىز ەتەدى.
الماتى اكىمى قوعامدىق دەنساۋلىق باسقارماسىنا جاعدايدى زەردەلەپ، جاڭا قوسالقى ستانسيالاردى اشۋ بويىنشا ۇسىنىستار ەنگىزۋدى تاپسىردى. بۇدان باسقا ب. ساعىنتايەۆ ماتەريالدىق-تەحنيكالىق قامتاماسىز ەتۋ، "جەدەل جاردەم" قىزمەتكەرلەرىن قولداۋ ماسەلەلەرىن شەشۋدى تۇراقتى باقىلاۋدا ۇستاۋدى تاپسىردى.
قازىرگى ۋاقىتتا "جەدەل جاردەم" قىزمەتىندە قالانىڭ بارلىق اۋداندارىندا 11 قوسالقى ستانسيا بار، بۇل شاقىرۋ ورنىنا بريگادالاردىڭ تەز كەلۋىن قامتاماسىز ەتۋگە مۇمكىندىك بەرەدى. سونداي-اق ۇيىمعا اۆتوجوندەۋ شەبەرحانالارى، اقپاراتتىق-جەدەل ديسپەچەرلىك قىزمەت كىرەدى.
شۇعىل مەديسينالىق كومەكتى تۇراقتى نەگىزدە 200 بريگادا كورسەتەدى: رەانيماسيالىق، قارقىندى تەراپيا بريگادالارى، پەدياتريالىق، دارىگەرلىك، فەلدشەرلىك جانە پراكتيكالىق جۇمىس تاجىريبەسى بار، زاماناۋي مەديسينالىق تەحنولوگيالار مەن سىناقتان وتكەن ادىستەردى پايدالاناتىن جوعارى بىلىكتى مامانداردىڭ ۇلكەن شتاتى. ولار اۋرۋحاناعا دەيىنگى كەزەڭدە ناۋقاستار مەن زارداپ شەككەندەرگە ۋاقتىلى دياگنوز قويۋ جانە كومەك كورسەتۋ ءۇشىن بارلىق قاجەتتىلىكتەرمەن جابدىقتالعان. سونىمەن قاتار، 25 بريگادا رەزەرۆتە تۇر.
قالا اكىمدىگىنىڭ قولداۋىمەن سوڭعى ەكى جىلدا قىزمەتتىڭ نەگىزگى ماسەلەلەرى شەشىلدى. ىنتالاندىرۋ كومپونەنتتەرىن تولەۋگە جەرگىلىكتى بيۋدجەتتەن 256 ميلليون تەڭگە ءبولىندى. اۆتوپارك 70% جاڭارتىلدى، 140 "جەدەل جاردەم" اۆتوكولىگى ساتىپ الىندى.