كۇدىكتى ۇرلانعان زاتتاردى لومباردقا وتكىزىپ تۇرعان جەرىنەن ۇستالدى
جەدەل ىزدەستىرۋ ءىس-شارالارىن جۇرگىزۋ بارىسىندا كەنتاۋ قالاسىنىڭ بىرىندەگى قوناق ۇيگە ايالداعان وسكەمەننىڭ ەكى تۇرعىنى تۇركىستان قپب كريمينالدىق پوليسيا قىزمەتكەرلەرىنىڭ نازارىنا ءتۇستى. ولاردىڭ ءبىرىن جەدەل ۋاكىلدەر ۇرلاپ العان زاتتاردى تۇركىستان قالاسىنداعى لومباردقا وتكىزىپ تۇرعان جەرىنەن قولعا ءتۇسىردى.
«ءبىز ۇستاعان جىگىتتىڭ بۇرىن قاراقشىلىق قىلمىسى ءۇشىن سوتتالعانىن انىقتادىق. كۇدىكتىنىڭ ايتۋىنشا، دوسىمەن بىرگە 5 قاڭتاردا الماتىعا بارعان. ياعني، جاپپاي تارتىپسىزدىك كەزىندە Kcell، Activ دۇكەندەرىنىڭ ءبىرىن توناپ، ول جەردەن بەس Samsung تەلەفونىن، ەكى سىمسىز قۇلاققاپتى جانە Apple Watch برەندتىك سمارت-ساعاتتى ۇرلاپ، الىپ كەتكەن. وسىلايشا ولار ميلليون تەڭگە كولەمىندە ماتەريالدىق شىعىن كەلتىرگەن. ىزدەرىن جاسىرۋ ماقساتىندا جاس جىگىتتەر وسكەمەنگە قايتقان. سول جاقتا ءۇش تەلەفوندى لومباردقا وتكىزىپ، اقشاسىن ءوز قاجەتتىلىكتەرىنە جۇمساپ جىبەرگەن. الدىن الا جوسپارلى تۇردە ارەكەت ەتكەن ەكەۋ بلوك-بەكەتتەردىڭ بارلىق جەردە الىنىپ تاستالعانىن پايدالانىپ، تۇركىستان وبلىسىنا تاكسيمەن كەلگەن. بۇگىنگى تاڭدا اتالعان جايتقا بايلانىستى تەرگەۋشىلەرمەن ق ر قك 188-بابى (ۇرلىق) بويىنشا سوتقا دەيىنگى تەرگەۋ جۇمىستارى جۇرگىزىلۋدە. كۇدىكتى قاماۋعا الىندى. ال ايعاقتى زات رەتىندە ۇرلانعان زاتتاردىڭ ءبىر بولىگى تاركىلەندى. سوتقا دەيىنگى تەرگەۋ كەزىندە ءبىز وسى قىلمىستىڭ بارلىق جاي-جاپسارىن انىقتايتىن بولامىز»، – دەدى تۇركىستان وبلىسىنىڭ پوليسيا دەپارتامەنتى باستىعىنىڭ ورىنباسارى اسىلجان قالداربەكوۆ.
قازىرگى تاڭدا پوليسيا قىزمەتكەرلەرىمەن كۇدىكتىنىڭ سىبايلاسى ىزدەستىرىلۋدە.