قازاقستاندا اسكەري سوتتىڭ قىلمىستىق ىستەر جونىندەگى سوت القاسى قاڭتارداعى وقيعالار كەزىندە الماتىدا اتىپ ولتىرىلگەن ءتورت جاسار ايكوركەم مەلدەحاننىڭ قازاسى تۋرالى ءىس شەڭبەرىندە «وكىلەتتىگىن اسىرا پايدالاندى» دەپ ايىپتالعان اسكەري قىزمەتشى ارمان جۇمانعا (ق ر قك 451-بابى 2-بولىگىنىڭ 1-تارماعى) ءبىرىنشى ساتىداعى اقتاۋ ۇكىمىنىڭ كۇشىن جويدى، دەپ حابارلايدى Almaty-akshamy.kz.
وعان جەتى جىل باس بوستاندىعىنان ايىرۋ جازاسى تاعايىندالدى، دەپ جازادى ازاتتىق راديوسىنىڭ قازاق رەداكسياسى.
ءىستى ءبىرىنشى ساتىداعى سوتتا قاراۋ بارىسىندا جۇمانعا جازانىڭ ەڭ كوپ مەرزىمىن – جەتى جىل باس بوستاندىعىنان ايىرۋدى تاعايىنداۋ تۋرالى ءوتىنىش بىلدىرگەن ايىپتاۋشى تاراپ شىعارىلعان ۇكىمگە قاناعاتتانعانىن مالىمدەدى.ءوز كەزەگىندە ايكوركەمنىڭ اكەسى ايدوس مەلدەحانوۆ ۇكىممەن كەلىسپەيتىنىن مالىمدەدى. «ارمان جۇماندى قىزمەتىن اسىرا پايدالانعانى ءۇشىن ەمەس، كىسى ولتىرگەنى ءۇشىن سوتتاۋ كەرەك ەدى. جەتى جىل دەگەن نە؟ ەكى جىلدان كەيىن شىعادى»، - دەگەن بولاتىن ول.
ءوز كەزەگىندە سوتتالۋشىنىڭ ادۆوكاتى وكسانا مۋسوحاروۆا ۇكىم جاريالانعاننان كەيىن كاسساسيالىق شاعىم بەرەتىنىن مالىمدەدى. «جۇمان ارماننىڭ وكىلەتتىگىنەن اسىرا پايدالانعانى تۋرالى ەشقانداي دالەل جوق»، - دەپ اتاپ ءوتتى ول.
سوت ارمان جۇمانعا اقتاۋ ۇكىمىن 2023 جىلدىڭ قاراشاسىندا شىعاردى.
ايكوركەم مەلدەحان وتباسىنىڭ كولىگىنە 7 قاڭتاردا الماتىدا قالالىق اكىمدىككە جاقىنداعان كەزدە اتىلعان. وق قىزدىڭ باسىنا ءتيىپ، ول سول جەردە جان تاپسىرعان. كولىكتە ونىڭ ۇلكەن اعالارى مەن اپكەسى دە بولدى، ولار دا جاراقات الدى. بالالاردىڭ اكەسى ايدوس مەلدەحانوۆ ماشينادا اتىلعان وقتان 20 تەسىك ساناعان. ول بالليستيكالىق ساراپتاما بۇل قارۋدى اسكەريلەر قولداناتىنىن راستاعانىن ايتتى.
مەلدەحان وتباسى قازاقستاننىڭ ۇلتتىق قاۋىپسىزدىك كوميتەتى قىزمەتكەرلەرىنىڭ قوقان-لوققىسىنان كەيىن قازاقستاننان كەتۋگە ءماجبۇر بولدى. اكەسى مەلدەحان قاۋىپسىزدىك ماقساتىندا ونىڭ وتباسى قايدا كەتكەنىن ناقتىلامادى. ەر ادامنىڭ ايتۋىنشا، ۇقك قىزمەتكەرلەرى وعان بىرنەشە رەت كەلىپ، قورقىتقان: ارنايى قىزمەتتە ولار ايدوستىڭ بەلسەندى ۇستانىمىنا، جۋرناليستەرگە بەرگەن سۇحباتتارىنا جانە سويلەگەن سوزدەرىنە نارازى بولعان.