ساراپشىلىق توپ الماتى، تاراز جانە تالدىقورعاندا 35-تەن استام سوت پروسەستەرىنە قاتىستى
ۆەنادا ەقىۇ دەموكراتيالىق ينستيتۋتتار جانە ادام قۇقىقتارى بيۋروسىنىڭ (دياقب) قر-داعى قاڭتار وقيعاسىنا بايلانىستى سوت پروسەستەرىنىڭ مونيتورينگى جونىندەگى ساراپشىلار توبىنا قايعىلى وقيعانىڭ ەكى جىلدىعىنا وراي تۇسىرىلگەن «قاڭتار. مەملەكەتتىك توڭكەرىس ارەكەتى. وقيعا قالاي ءوربىدى» دەرەكتى ءفيلمى ۇسىنىلدى، دەپ حابارلايدى Almaty-akshamy.kz.
فيلمدە ەلىمىزدەگى قالالارىنىڭ كوشەلەرىندەگى وقيعالاردىڭ بارىسى، نەگىزگى شەشىمدەردىڭ قالاي جانە قاشان قابىلدانعانى، داعدارىستان قالاي شىققانى جان-جاقتى سيپاتتالعان.
ونلاين كەزدەسۋگە دياقب-نىڭ قۇقىق ۇستەمدىگى ءبولىمىنىڭ باسشىسى گ. باربا، ساراپشىلار ك. سيمونسەن، ك. راسسەل، ا. پاسكەرو جانە باسقا دا بەلگىلى باقىلاۋشىلار قاتىستى.
2022 جىلعى قاراشادا قازاقستاندىق تاراپپەن قۇرىلعان ساراپشىلىق توپقا الماتى، تاراز جانە تالدىقورعان قالالارىندا ءوتىپ جاتقان 35-تەن استام سوت پروسەستەرىنە قاتىسۋعا، سونداي-اق قر-دىڭ مۇددەلى مەملەكەتتىك ورگاندارىمەن كەزدەسۋلەر ۇيىمداستىرۋعا قولعابىس كورسەتىلدى.
سونىمەن بىرگە، قورىتىندى ەسەپتى دايىنداۋ بارىسى جانە «قاڭتار وقيعاسى» سوت پروسەستەرىنىڭ مونيتورينگى جوباسى اياسىندا بيۋرو ساراپشىلارىنىڭ قازاقستانعا الداعى قورىتىندى ساپارى تالقىلاندى،- دەپ جازدى ۆەدومستۆو.