الماتى قالالىق پروكۋراتۋراسى جەر سىلكىنىسى كەزىندە جالعان اقپارات تاراتقان حابارلاما اۆتورلارىن تاپتى.
الماتىدا 23-قاڭتار ءتۇن ىشىندە جەر سىلكىنگەنى بەلگىلى. حالىقتىڭ زارە-قۇتى قاشقان ساتتە ونى ودان ارى ۇدەتە تۇسەتىندەر ءارقاشان تابىلادى. سول كەزدە دە ءارتۇرلى الەۋمەتتىك جەلىلەردە جانە مەسسەندجەر چاتتارىندا تابيعي اپاتتىڭ سالدارى تۋرالى كورىنەۋ جالعان حابارلامالاردى ورنالاستىرۋ فاكتىلەرى ورىن الدى. بۇل ءوز كەزەگىندە ازاماتتار اراسىندا دۇربەلەڭ جانە كەڭ قوعامدىق رەزونانس تۋدىردى، دەپ حابارلايدى Almaty-akshamy.kz الماتى قالاسىنىڭ پروكۋراتۋراسىنا سىلتەمە جاساپ.
«جەر سىلكىنىسى كەزىندە الەۋمەتتىك جەلىلەر مەن مەسسەندجەرلەردە تابيعي اپاتتىڭ سالدارى تۋرالى كورىنەۋ جالعان حابارلامالاردى ورنالاستىرۋ فاكتىلەرى انىقتالدى، بۇل ءوز كەزەگىندە ازاماتتار اراسىندا دۇربەلەڭ جانە كەڭ قوعامدىق رەزونانس تۋدىردى. مۇنداي ارەكەتتەردى جاساۋ فاكتىلەرى بويىنشا قازىرگى ۋاقىتتا 1995 جانە 2006 جىلدارى تۋعان ەكى ايەلدىڭ جەكە باسى انىقتالدى»، دەلىنگەن پروكۋراتۋرا حابارلاماسىندا.
جالعان اقپارات تاراتقان ەكى ايەلگە اكىمشىلىك قۇقىق بۇزۋشىلىق تۋرالى كودەكستىڭ 456-2-بابىنىڭ 3-بولىگى بويىنشا 10 اەك كولەمىندە ايىپپۇل سالىندى.