ازاپتاۋ دەرەگى بويىنشا 203 قىلمىستىق ءىس قوزعالدى.
باس پروكۋراتۋرانىڭ وتىرىسىندا قاڭتار وقيعاسىنداعى ازاماتتاردىڭ كونستيتۋسيالىق قۇقىعىن ساقتاۋ ماسەلەلەرى تالقىلاندى، دەپ حابارلايدى Almaty-akshamy.kz
پروكۋراتۋرانىڭ باسپا ءسوز قىزمەتىنىڭ مالىمەتىنشە، وتىرىسقا باس پروكۋروردىڭ مىندەتىن اتقارۋشى بەرىك اسىلوۆ، ادام قۇقىقتارى جونىندەگى ۋاكىل ەلۆيرا ءازىموۆا، رەسپۋبليكالىق ادۆوكاتتار القاسى ءتوراعاسىنىڭ ورىنباسارى يگور ۆرانچيەۆ، قۇقىق قورعاۋ جانە ارنايى ورگانداردىڭ باسشىلارى قاتىستى.
بەرىك اسىلوۆ مەملەكەت باسشىسىنىڭ تاپسىرماسى بويىنشا قايعىلى وقيعانىڭ سەبەپتەرى مۇقيات تەرگەپ-تەكسەرىلىپ جاتقانىن اتاپ ءوتتى.
«ءقازىر ءبىز بەيبىت ميتينگتەردى ءارتۇرلى كۇشتەردىڭ پايدالانعانىن ناقتى بىلەمىز. ۇيىمداستىرۋشىلار دەسترۋكتيۆتى جانە قىلمىستىق توپتاردى تارتىپ، قارۋلاندىرىپ، ولاردىڭ ارەكەتتەرىن ۇيلەستىرگەن. تارتىپسىزدىكتەر ازاماتتارعا قارسى زورلىق-زومبىلىقپەن، قيراتۋمەن جانە توناۋمەن قاتار جۇرگەن. ولاردىڭ ماقساتى حالىقتى قورقىتىپ، بيلىكتىڭ جۇمىسىنا توسقاۋىل قويۋ بولدى»، - دەدى باس پروكۋروردىڭ مىندەتىن اتقارۋشى.
باس پروكۋراتۋرا قىلمىستىق قۋدالاۋ قىزمەتىنىڭ باسشىسى سەرىك شالابايەۆ قاڭتار وقيعاسى كەزىندە جانە كەيىن ۇستالعانداردىڭ قۇقىعىن قورعاۋ ەرەكشە باقىلاۋدا ەكەنىن جەتكىزدى.
«بۇگىندە ازاپتاۋ جانە قىزمەتتىك وكىلەتتىكتى اسىرا پايدالانۋ بويىنشا 203 قىلمىستىق ءىس قوزعالدى. ولاردىڭ ىشىندەگى ەڭ رەزونانس تۋدىرعاندارىن ارنايى پروكۋرورلار تەكسەرىپ جاتىر. سوتقا دەيىنگى تەرگەپ-تەكسەرۋ بارىسىندا ۇستالعاندارعا قاتىستى زاڭسىز تەرگەۋ ادىستەرىن قولداندى دەگەن كۇدىكپەن 9 قىزمەتكەر ۇستالدى»، - دەدى باسشى.
ونىڭ ايتۋىنشا، قاڭتار وقيعاسى سالدارىنان تەرگەۋ-جەدەل توپتارى تەرروريزم اكتىلەرى، كىسى ءولتىرۋ، قارۋ ۇرلاۋ جانە جاپپاي تارتىپسىزدىكتەر بويىنشا 3502 قىلمىستىق ءىستى تەرگەۋدە. بۇل ىستەر بويىنشا 737 كۇدىكتى تەرگەۋ يزولياتورىندا قاماۋدا وتىر. سەرىك شالابايەۆ بۇلتارتپاۋ شاراسىن وزگەرتۋمەن 307 ادام، ونىڭ ىشىندە كامەلەتكە تولماعان 27 ءجاسوسپىرىم قاماۋدان بوساتىلعانىن، 2 ءجاسوسپىرىم قاماۋدا وتىرعانىن ايتتى. بۇگىندە بۇلتارتپاۋ شاراسىن وزگەرتۋ تۋرالى ارنايى پروكۋرورلاردان تاعى 22 ادامعا قاتىستى ماتەريالدار تۇسكەن.