وعان دالەل - 2021 جىلى دەنساۋلىق ساقتاۋ سالاسىندا 71 جەمقورلىق فاكتىسى تىركەلگەن.
ۆەدومستۆونىڭ كەڭەيتىلگەن القا وتىرىسىندا مينيستر اجار عينيات وسىنداي دەرەك كەلتىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەملەكەت باسشىسى «سق-فارماسيا» بازاسىندا مەديسينالىق تەحنيكانى ورتالىقتاندىرىلعان ساتىپ الۋعا كوشۋدى تاپسىردى. وسىعان بايلانىستى وڭىرلەردىڭ قاجەتتىلىگىنە تالداۋ جۇرگىزىلىپ، نورماتيۆتىك بازا مەن اقپاراتتىق جۇيەلەر پىسىقتالادى. بۇدان ءارى قارجىلاندىرۋ كوزدەرىن ايقىنداي وتىرىپ، 2025 جىلعا دەيىنگى باسىم باعىتتار بويىنشا مەديسينالىق تەحنيكامەن جاراقتاندىرۋ باعدارلاماسى بەكىتىلەدى»، - دەدى ۆەدومستۆو باسشىسى.
ونىڭ سوزىنە قاراعاندا، سىبايلاس جەمقورلىققا قارسى قىزمەتتىڭ تەكسەرۋلەرى مەديسينالىق جابدىقتاردى ساتىپ الۋ ۆەدومستۆوداعى بيۋدجەت قاراجاتىن جىمقىرۋدىڭ نەگىزگى كوزدەرىنىڭ ءبىرى ەكەنىن كورسەتكەن.
«جالپى، 2021 جىلى 71 قىلمىستىق قۇقىق بۇزۋ فاكتىسى انىقتالدى. سونداي-اق، مەديسينالىق قوسپالاردى تولەۋگە بولىنگەن بيۋدجەت قاراجاتىنىڭ ماقساتسىز جۇمسالعانى بايقالادى. مونيتورينگتىك توپتاردىڭ جۇمىسىندا زاڭسىزدىقتار انىقتالدى. ۆاكسينالاۋدىڭ جالعان ەلەكتروندىق پاسپورتتارىن بەرۋ فاكتىلەرى تىركەلگەنىن بىلەسىزدەر. ونداي ساناتتاعى زاڭسىزدىقتار، اسىرەسە، نۇر-سۇلتان جانە الماتى قالالارىندا، تۇركىستان، الماتى، اقمولا جانە قوستاناي وبلىستارىندا ءجيى تىركەلدى. سالادا سىبايلاس جەمقورلىق كورىنىستەرىمەن ىمىراسىز كۇرەس ساياساتى جالعاساتىنىن ايتقىم كەلەدى»، - دەدى مينيستر.