قاسيەتتى ميعراج تۇنىندەگى قۇلشىلىق پەن دۇعالارىمىز قابىل بولعاي!

باس ءمۇفتي ناۋرىزباي قاجى تاعان ۇلى جاماعاتقا وسىنداي جازبا ارنادى.

ميعراج ءتۇنى 2022 جىلى 28 اقپاننان 1 ناۋرىزعا قاراعان تۇنگە، ياعني بۇگىنگى تۇنگە سايكەس كەلىپ تۇر، دەپ حابارلايدى Almaty-akshamy.kz

اسا قامقور ەرەكشە مەيىرىمدى
اللانىڭ اتىمەن باستايمىن!
 
قۇرمەتتى باۋىرلار!

اللا تاعالا قاسيەتتى قۇراندا: «اللانىڭ كوكتەر مەن جەردى جاراتقان كۇنى جازعان ۇكىمى بويىنشا ايلاردىڭ سانى – ون ەكى، ولاردىڭ تورتەۋى – حارام ايلار. مىنە، ادامزاتتىڭ يگىلىگى ءۇشىن ەڭ دۇرىس ءارى ءمىنسىز جۇيە – وسى. ەندەشە، بۇل ايلاردا وز-وزدەرىڭە قيانات جاساماڭدار» («تاۋبە» سۇرەسى، 36-ايات) دەپ ەسكەرتەدى.
وسى ءتورت ۇلىق ايلاردىڭ ءبىرى – ەرەجەپ. ال ەرەجەپ ايىنىڭ جيىرما التىسىنان جيىرما جەتىسىنە قاراعان ءتۇن، ياعني يسلام تاريحىندا ورىن العان ماڭىزدى وقيعا – ميعراج.
وسى ءتۇندى جابىرەيىل پەرىشتە (وعان اللانىڭ سالەمى بولسىن) پايعامبارىمىز مۇحاممەدكە (وعان اللانىڭ سالاۋاتى مەن سالەمى بولسىن): «ۋا، مۇحاممەد، اللا تاعالا ەشكىمگە ءناسىپ ەتپەگەن شاراپاتتى ساعان ءناسىپ ەتپەك. سەنى قۇزىرىنا شاقىرىپ جاتىر»، – دەيدى. وسىدان كەيىن جابىرەيىل پەرىشتە (وعان اللانىڭ سالەمى بولسىن) ونى حارام مەشىتىنەن اقسا مەشىتىنە ءبىر ساتتە الىپ كەلەدى. بۇل تۋرالى «يسرا» سۇرەسىنىڭ 1-اياتىندا: «قۇلىن (مۇحاممەدتى) ءبىر تۇندە حارام مەشىتىنەن اينالاسىنا ءوزىمىز قۇت-بەرەكە دارىتقان اقسا مەشىتىنە كەيبىر ماڭىزدى بەلگىلەرىمىز بەن دالەلدەرىمىزدى كورسەتۋ ءۇشىن الىپ بارعان اللا – ءمىنسىز، پاك. ول شاك-شۇباسىز ءبارىن ەستۋشى، ءبارىن دە كورۋشى»، – دەپ باياندالادى.
ودان كەيىن پايعامبارىمىز (وعان اللانىڭ سالاۋاتى مەن سالەمى بولسىن) ءتۇننىڭ ءبىر ۋاقىتىندا اقسا مەشىتىنەن اسپانداعى ءسيدراتۋل-مۇنتاحاعا كوتەرىلىپ ميعراج جاساعان.
پايعامبارىمىز (وعان اللانىڭ سالاۋاتى مەن سالەمى بولسىن) ميعراج تۇنىندە كوزىنە جاس الىپ، وزىنە ىلەسكەن بارلىق مۇسىلماندار ءۇشىن كوپ دۇعا-تىلەك جاسادى، ولاردى عافۋ ەتۋدى سۇرادى.
ارداقتى پايعامبارىمىز (وعان اللانىڭ سالاۋاتى مەن سالەمى بولسىن): «ۋا، راببىم! مەنى ميعراج مۇعجيزاسىمەن نىعمەتتەندىردىڭ. ۇممەتىمە دە وسىنداي ءبىر نىعمەت سۇرايمىن»، – دەپ دۇعا جاساعاندا، اللا تاعالا ونى: «ناماز – مۇمىندەردىڭ ميعراجى»، – دەپ قۋانتقان.
 
ءقادىرلى جاماعات!
 
اللا تاعالا ميعراج ءتۇنى مەن وندا بولىپ وتكەن عاجايىپ وقيعالاردىڭ بەرەكەتىمەن يمانىمىزدى باياندى ەتسىن. قاسيەتتى ايلار مەن كۇندەردە جاراتقان يەمىز كۇنالارىمىزدى كەشىپ، ەكى دۇنيەنىڭ باقىتىن بەرسىن. قيامەت كۇنى پايعامبارىمىزدىڭ (وعان اللانىڭ سالاۋاتى مەن سالەمى بولسىن) شاپاعاتى بارشامىزعا ءناسىپ بولسىن!
اسا مەيىرىمدى اللا تاعالا ەرەجەپ پەن شاعبان ايلارىندا دۇنيە جانە ءدىن ىستەرىمىزگە بەرەكە بەرىپ، رامازان ايىنا امان-ەسەن جەتكىزسىن! ءبىزدىڭ ميعراجىمىز بولعان نامازدارىمىزدا ەلىمىزدىڭ، حالقىمىزدىڭ اماندىعىن جانە الەم تىنىشتىعىن تىلەيىك! قاسيەتتى ميعراج تۇنىندەگى قۇلشىلىق پەن دۇعالارىمىز قابىل بولعاي. ءامين!