بۇل تۋرالى باس پروكۋروردىڭ ورىنباسارى اسەت شىندالييەۆ مالىمدەدى.
وسى جىلدىڭ قاڭتارىندا جاپپاي تارتىپسىزدىككە قاتىسقان قازاقستاندىقتاردىڭ باسىم بولىگى راقىمشىلىققا ىلىگەدى، دەپ حابارلايدى Almaty-akshamy.kz
«ءبىزدىڭ بولجام بويىنشا راقىمشىلىققا 1،5 مىڭداي ادام ىلىگەدى. باسىم بولىگى – قاراپايىم ازاماتتار»، - دەدى شىندالييەۆ.
ايتۋىنشا، امنيستيا جاپپاي تارتىپسىزدىك، ۇرلىق جانە باسقا دا قىلمىستارمەن بايلانىستى باپتار بويىنشا جاۋاپقا تارتىلىپ جاتقان ازاماتتارعا قاتىستى قولدانىلادى.
ماجىلىستە «راقىمشىلىق تۋرالى» زاڭ جوباسىن قاراۋ كەزىندە شىندالييەۆ قاڭتار وقيعاسى بويىنشا بارلىعى قۇقىق قورعاۋ ورگاندارىنىڭ 49 قىزمەتكەرىنە قاتىستى قىلمىستىق ءىس قوزعالعانىن مالىمدەدى.
سول 49 ادامنىڭ بىرەۋى عانا راقىمشىلىققا ىلىگەدى. ول قىلمىستىق كودەكستىڭ 432-بابى «قىلمىستى جاسىرىپ قالۋ» بويىنشا جاۋاپقا تارتىلۋدا.
«قۇقىق قورعاۋ ورگاندارىنىڭ قالعان قىزمەتكەرىنە راقىمشىلىق جاسالمايدى»، - دەدى شىندالييەۆ ءماجىلىس وتىرىسىندا.