ءوتىنىش قابىلداۋ جىل سوڭىنا دەيىن جالعاسادى
الماتىدا قاڭتار وقيعاسى كەزىندە شىعىنعا ۇشىراعان كاسىپكەرلەردىڭ باسىم بولىگى وتەماقى الىپ ۇلگەردى. ولارعا جەرگىلىكتى بيۋدجەت قاراجاتى ەسەبىنەن جانە ءتۇرلى ۇيىمداردىڭ قولداۋىمەن 16 ملرد تەڭگەدەن استام قارجى تولەنگەن، دەپ حابارلايدى Almaty-akshamy.kz Almaty.tv-گە سىلتەمە جاساپ.
قاڭتار قىرعىنى كەزىندە رايىمبەك باتىر داڭعىلىندا قاسكويلەر جولدى بوگەپ، كولىك قاتىناسىن قيىنداتقان ەدى. ولاردىڭ سول كەزدەگى ماقساتى - ساۋدا ءۇيىن قيراتىپ، توناۋ ەدى. سولاي بولدى دا. ەسىكتى سىندىرىپ كىرىپ، باعالى زاتتىڭ ءبارىن قولدى قىلعان.
ساۋدا ۇيىندە كۇندەلىكتى ساتىپ وتىرعان تاۋارىنان ايىرىلعانداردىڭ ءبىرى – اينۇر ادامبەكوۆا. ءۇ بالاسىنىڭ ءناپاقاسىن وسى كاسىپپەن تاۋىپ وتىرعان ول باستاپقىدا قينالعانىن ايتادى. كەيىننەن مەملەكەت ولاردى قاراۋسىز قالدىرمادى. وتەماقى الىپ، از ۋاقىتتىڭ ىشىندە كاسىبىن قايتا جانداندىردى.
«3 ملن-عا دەيىن توۆار اقشاسى قايتارىلادى دەدى. سوسىن چەگىن شىعارىپ بەردىك. ۇكىمەت 1 ملن قوسىمشا كومەك بەردى. سونىمەن بارلىعى 4 ملن الدىم. ريزا بولدىق. جۇمىسىمىزدى قايتا باستادىق»، – دەدى جەكە كاسىپكەر اينۇر ادامبەكوۆا
الماتىدا جىل باسىنان بەرى اينۇر سەكىلدى 1640 كاسىپكەر وتەماقى الىپ ۇلگەرگەن. 616 شاعىن جانە ورتا بيزنەس يەسى «جاڭا الاتاۋ» قورى ارقىلى اقشا السا، قالعانىنا جەرگىلىكتى بيۋدجەت قاراجاتى ەسەبىنەن تولەندى. ونىڭ جالپى قۇنى 16 ملرد 180 ملن تەڭگەدەن اسادى. ماماندار قاڭتار كەزىندە شىعىنعا ۇشىراعان كاسىپكەرلەردەن ءوتىنىش قابىلداۋ جىل سوڭىنا دەيىن جالعاساتىنىن ايتادى.
«ءوتىنىش info.kazakhstan سايتى ارقىلى بەرۋگە بولادى. كاسىپكەرگە ەشقايدا بارۋدىڭ قاجەتى جوق. ءوزىنىڭ ەسپ كىلتى ارقىلى كىرسە، بارلىق قۇجات تىزىمدە كورسەتىلگەن. قالعان كاسىپكەرلەر ماتەريالدارىن سوت ەكسپەرتيزادان تەزدەتىپ وتكىزىپ، قۇجاتتارىن تاپسىرۋ كەرەك. ايماقتىق كوميسسيا ءوز جۇمىسىن جىل سوڭىنا دەيىن جالعاستىرادى»، – دەدى الماتى قالالىق «اتامەكەن» ۇكپ مەدەۋ اۋدانى فيليالىنىڭ ديرەكتورى ايبەك قازىكەنوۆ.
زارداپ شەككەن بيزنەسمەندەرگە تەك وتەماقى بەرىلىپ قانا قويماي، قالالىق كاسىپكەرلىك باسقارماسى جەڭىلدەتىلگەن پايىزبەن نەسيە دە بەرىپ جاتىر. شاعىن جانە ورتا بيزنەس يەلەرى بار بولعانى 2 پايىزبەن 10 ملن تەڭگەگە دەيىن اقشا الا الادى. سونداي-اق باستاپقى 6 ايعا دەيىن ولار سالىق پەن قوسىمشا ايىپپۇلداردان دا بوساتىلادى ەكەن.
«ءقازىر قاڭتار وقيعاسى كەزىندە شىعىنعا ۇشىراعان كاسىپكەرلەردىڭ 99 پايىزى وتەماقىلارىن الىپ ۇلگەردى. ال وتەماقىدان بولەك، نەسيەگە كەلەر بولساق، ول «الماتى بيزنەس-2025» باعدارلاماسى ارقىلى بەرىلەدى. ول ءۇشىن قالا بيۋدجەتىنەن 6 ملرد 300 ملن تەڭگە قاراستىرىلعان»، – دەدى كاسىپكەرلىك جانە ينۆەستيسيالار باسقارماسىنىڭ ءبولىم باسشىسى ءادىل جانكين.
ايتا كەتەيىك، قاڭتار قىرعىنى كەزىندە رەسپۋبليكا بويىنشا شىعىنعا ۇشىراپ، ەڭ كوپ زارداپ شەككەن عيماراتتىڭ باسىم بولىگى وسى مەگاپوليستە ەدى. ءبىر ايدىڭ ىشىندە كاسىپكەرلەردىڭ باسىم بولىگى وتەماقى الىپ، از ۋاقىتتا قالا تىرشىلىگىنە قان جۇگىردى.