ساتىلىمنان تۇسكەن قارجى ەرەكەشە قاجەتتىلىگى بار بالالاردىڭ ەمىنە جۇمسالماق.
«بورتە» سپەكتاكلىندەگى باس كيىم 4 ملن تەڭگەگە ساتىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بولاشاق» كورپوراتيۆتىك قورى ۇيىمداستىرعان ءحىىى قىسقى قايىرىمدىلىق بالىندا اۋكسيونعا شىعارىلعان جادىگەرلەر اراسىندا ءتۇرلى اشكەيلەرمەن اسپەتتەلگەن ساۋكەلە دە بولدى. بۇل باس كيىمدى تۇركىستان مۋزىكالىق دراما تەاترىنىڭ العاش شىمىلدىعىن اشقان «بورتە» قويىلىمىنداعى كەيىپكەر بورتە حانىم كيگەن بولاتىن.
ساۋكەلەنىڭ الدىنا تازا كۇمىستەن جاسالعان ويۋلار مەن كوزدىڭ جاۋىن الار مونشاقتار تاعىلعان. ال، ەكى جاعىنداعى قوس جاقتاۋدىڭ جيەگى التىن تۇستەس جىبەك ورىممەن جيەكتەلگەن. قوس جاقتاۋى مەن ساۋكەلەنىڭ ارتقى جاعىندا بەكىتىلگەن شاشقاپ تا كۇمىس اشەكەيلەرمەن بەزەندىرىلگەن. سونداي-اق، كوگىلدىر اقىق، مەرۋەرت، لاعىل تاستاردان سالپىنشاق سىرعا تارىزدەس ەتىپ بەزەندىرىلگەن.
كەشەگى كۇنى وتكەن اۋكسيوندا باس كيىم 4 ملن تەڭگەگە ساتىلدى.
ۇيىمداستىرۋشىلاردىڭ ايتۋىنشا، ساتىلىمنان تۇسكەن قارجى ەرەكەشە قاجەتتىلىگى بار بالالاردىڭ ەمىنە جۇمسالماق.
تەاتر ماماندارىنىڭ سوزىنە سۇيەنسەك، تۇركىستان مۋزىكالىق دراما تەاترىندا بورتەنىڭ ەكى باس كيىمى بار. سونىڭ ءبىرى ساتىلىمعا شىققان. ال، ەكىنشىسى تەاتردا ساقتاۋلى تۇر. ونى كەلەسى قويىلىمداردا ارتىستەر قولداناتىن بولادى.
ايتا كەتەيىك، جەلتوقسان ايىنىڭ 23-24 كۇندەرى تۇركىستاندا «بورتە» سپەكتاكلى كوپشىلىك نازارىنا ۇسىنىلادى.