تارتىپسىزدىك كەزىندە 2 مىڭنان استام بيزنەس يەسى شىعىنعا باتقان
1 جەلتوقانعا دەيىن قاڭتارداعى بەيبەرەكەتتە زارداپ شەككەن بارلىق كاسىپ يەلەرىنىڭ شىعىنى وتەلىپ بىتەدى. بۇل تۋرالى الماتى كاسىپكەرلەر پالاتاسىنىڭ ديرەكتورى مالەمدەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ايتۋار قوشمامبەتوۆتىڭ ايتۋىنشا، تارتىپسىزدىك كەزىندە 2 مىڭنان استام بيزنەس يەسى شىعىنعا باتقان. مۇلكى تونالىپ، كاسىبى كەرى كەتكەن كاسىپكەرلەرگە مەملەكەت 15 ميلليارد تەڭگە وتەماقى تولەگەن. ال ەڭ كوپ زارداپ شەككەن نىسانداردىڭ كوشىن ەلەكتروندى تاۋارلار دۇكەنى مەن برەندتتىك كيىمدەر باستاپ تۇر.
ەلەكتروندى تاۋارلاردى ساتۋمەن اينالىساتىن كاسىپكەر ديانا ايدارحان بەسىنشى قاڭتار كۇنى استاڭ-كەستەڭى شىققان تاۋارلارىن تەرىپ، جيناپ الىپتى. ۇرىلار 10 مينۋتتىڭ ىشىندە كىرىپ، باعالى زاتتارىمدى الىپ كەتكەن.
«انا جاقتان قول ءىزىن كورەسىز، سودان سەكىرىپ ىشىنەن تەۋىپ اشقان. ءتورت جىگىت بەتپەردە، كەپكا كيىپ العان. كامەرالاردىڭ بارىنەن كورۋگە بولادى. مەملەكەت بىزگە تولىعىمەن كومەكتەستى. باسقا جەكە كاسىپكەرلەردەن كومەك سۇراعان جوقپىز»، – دەدى كاسىپكەر ديانا ايدارحان.
ال كاسىپكەرلەر پالاتاسى شاعىن جانە ورتا بيزنەس شىعىنىن انىقتاۋ، ارنايى كوميسسيانىڭ شەشىم شىعارۋى ءبىراز ۋاقىتقا سوزىلعانىن ايتادى. سوندىقتان كەيبىرىنىڭ شىعىنى ءالى وتەلمەپتى. سەبەبى سالىقتىق تابىس قۇجاتى تولىق ەمەس. تابىس كوزىن جاسىرىپ، سالىق كوميتەتىنە ءتۇسىمدى دۇرىس كورسەتپەي كەلگەندەر بار.
«1632 كاسىپكەرگە 15 ميلليارد شاماسىندا سۋممانى قايتارىپ بەردىك. 2000 استام كاسىپكەر زارداپ شەكتى. الايدا پرەزيدەنتتىڭ تاپسىرماسىمەن قيىن جاعدايعا ۇشىرعان كاسىپكەرلەرگە قارجىلاي قايتارۋدى ۇيعاردىق. كوبى ءىرى تەحنيكا ساتاتىن دۇكەندەرگە، ساۋدا ورتالىقتارىنا بارعان»، – دەدى كاسىپكەرلەر پالاتاسىنىڭ ديرەكتورى ايتۋار قوشمامبەتوۆ.
پرەزيدەنت قاسىم جومارت توقايەۆ قاڭتارداعى بۇلىكتەن سوڭ شاعىن جانە ورتا بيزنەسكە قولداۋ ءبىلدىرۋ كەرەك دەپ ارنايى تاپسىرما بەرگەن. شىعىنعا باتقان بارلىق كاسىپ يەلەرىنە 1 جەلتوقسانعا دەيىن وتەماقى تولەنىپ بىتەدى. ال قاجەتتى قۇجاتى بولماعان بيزنەس يەلەرىنە دەمەۋشىلەردىڭ قارجىسى بولىنەدى ەكەن.