ۇسىنىلعان زاڭدار حالىق پەن بيلىكتى بايلانىستىرۋعا باعىتتالعان
قازاقستاندا كەلەسى جىلدىڭ 1 قاڭتارىنان باستاپ كونستيتۋسيالىق سوت جۇمىس ىستەي باستايدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بيىل قاڭتاردان كەيىن مەملەكەت باسشىسى ەلدىڭ ساياسي جۇيەسىن تۇبەگەيلى وزگەرتۋگە كىرىستى. 50-دەن استام زاڭدى رەتتەۋدى ۇسىنىپ، جازدا بۇكىلحالىقتىق رەفەرەندۋم وتكىزدى. ۇسىنىلعان زاڭدار حالىق پەن بيلىكتى بايلانىستىرۋعا باعىتتالىپ، ادىلەتسىزدىككە تاپ بولعان ازاماتتاردىڭ ماسەلەسىن جەدەل شەشۋگە ارنالعان ەدى. كونستيتۋسيالىق سوت بولىپ وزگەرەتىن قازىرگى كەڭەس وسىنداي كۇرمەۋى قيىن ماسەلەلەردىڭ ءتۇيىنىن تارقاتاتىن بولادى. ياعني، ەندى كەز كەلگەن قازاقستاندىقتىڭ وسى كونستيتۋسيالىق سوتقا جۇگىنۋىنە مۇمكىندىك تۋىپ وتىر. زاڭ عىلىمدارىنىڭ دوكتورى ەرمەك ءابدىراسىلوۆ قاڭتار وقيعاسى وسىنداي زاڭداردى قابىلداۋعا مۇمكىندىك بەرگەنىن ايتتى.
«بيىلعى قاڭتار وقيعاسى قايتالانبايدى دەپ ويلايمىن. وعان كوپ سەبەپ بولدى. ءقازىر الدىن الىپ، پروبلەمالار شەشىلىپ جاتىر. كوپتەگەن زاڭ قابىلدانىپ جاتىر»، – دەدى زاڭ عىلىمدارىنىڭ دوكتورى ەرمەك ءابدىراسىلوۆ.
ماماننىڭ ايتۋىنشا، رەفەرەندۋمدا قابىلدانعان وزگەرىستەر ءادىل قازاقستان قاعيداسىنا تۋرا كەلەدى. سوندىقتان كونستيتۋسيالىق وزگەرىستەردى جۇدىرىقتاي جۇمىلىپ بىرگە ىسكە اسىرۋ قاجەت. ال سەنات دەپۋتاتى سەرىكباي تۇرىموۆ قاسىرەتتى قاڭتار دەموكراتيالى قوعامنىڭ بار ەكەنىن كورسەتتى دەپ وتىر.
«قاڭتار وقيعاسى ءبىراز ماسەلەنىڭ باسىن اشتى دەپ ايتۋعا تولىق نەگىز بار. سوندىقتان وسىدان كەيىنگى مەملەكەت باسشىسىنىڭ ءوزى دە ايتتى، وسى ەكونوميكالىق جاعدايعا عانا ەمەس، ساياسي ماسەلەلەرگە دە ءمان بەرۋىمىز كەرەك»، – دەدى ق ر پارلامەنتى سەناتىنىڭ دەپۋتاتى سەرىكباي تۇرىموۆ
دەپۋتاتتىڭ سوزىنشە، قازىرگى كەزدە ەڭ ءبىرىنشى بەيبىتشىلىكتى ويلاۋ كەرەك. رەفورمالاردى قولداپ، قابىلدانىپ جاتقان زاڭداردىڭ جۇمىس ىستەۋىنە بىرگە اتسالىسقان ابزال.