ساۋدا اينالىمى قالپىنا ءتۇستى.
ءبىرىنشى توقساننىڭ قورىتىندىسى بويىنشا، بولشەك ساۋدا كولەمى 737،8 ملرد تەڭگەنى، كوتەرمە ساۋدا اينالىمى 2،4 ترلن تەڭگەنى قۇرادى. بۇل تۋرالى 3 مامىر كۇنى قالالىق كاسىپكەرلىك جانە ينۆەستيسيالار باسقارماسىنىڭ باسشىسى ەركەبۇلان ورازالين بريفينگتە ايتتى، دەپ حابارلايدى اlmaty-akshamy.kz.
«وزدەرىڭىزگە بەلگىلى، الماتىداعى وڭىرلىك كوميسسيا بيزنەسكە كەلتىرىلگەن زالالدى دەرەۋ وتەۋگە كىرىستى. بۇگىنگى تاڭدا كوميسسيا جالپى سوماسى 11 ملرد تەڭگەدەن (11 045،9 ملن. تگ) استام 1499 ءوتىنىمدى ماقۇلدادى. زارداپ شەككەن كاسىپكەرلەردىڭ 95%-ى وتەماقى الدى. بۇگىن ولار كەلۋشىلەرگە ەسىگىن ايقارا اشىپ، ادەتتەگى قىزمەتىن قايتا باستاپ كەتتى. كوميسسيانىڭ قاراۋىندا ساراپتاما جۇرگىزۋدى، جسق ازىرلەۋدى جانە راستايتىن قۇجاتتاردى قالپىنا كەلتىرۋدى تالاپ ەتەتىن ەڭ كۇردەلى جاعدايلار قالدى. بيزنەسكە كەلتىرىلگەن زالالدى وتەۋ جۇمىستارىن اعىمداعى جىلدىڭ مامىر ايىندا اياقتاۋدى جوسپارلاپ وتىرمىز»، - دەدى ەركەبۇلان ورازالين.
مامانداردىڭ ايتۋىنشا، تۇتاستاي العاندا، الماتىداعى شاعىن جانە ورتا بيزنەس ءوزىنىڭ ۇتقىرلىعى مەن يكەمدىلىگىنە بايلانىستى جاڭا جاعدايعا تەز بەيىمدەلە الادى. جىلدىڭ العاشقى ءۇش ايىنىڭ قورىتىندىسى بويىنشا، ءبىز جەكە كاسىپكەرلىكتە جاقسى ءوسۋ الەۋەتىن بايقادىق. ماسەلەن، جۇمىس ىستەپ تۇرعان شوب سۋبەكتىلەرىنىڭ سانى 2021 جىلدىڭ سايكەس كەزەڭىمەن سالىستىرعاندا 10،5%-عا ءوسىپ، 217 822 بىرلىكتى قۇرادى.
«ءبىزدىڭ ەڭ ماڭىزدى مىندەتتەرىمىزدىڭ ءبىرى – كاسىپكەرلەرگە كولەڭكەدەن شىعۋعا كومەكتەسۋ جانە ازاماتتاردى بەلسەندى ەكونوميكالىق قىزمەتكە تارتۋ. ول ءۇشىن ءبىز ءداستۇرلى ساۋدانى زاماناۋي وركەنيەتتى فورماتقا اۋىستىرامىز»، - دەدى قالالىق كاسىپكەرلىك جانە ينۆەستيسيالار باسقارماسىنىڭ باسشىسى ەركەبۇلان ورازالين.