پرەزيدەنت قاسىم-جومارت توقايەۆ 7 جانە 9 مامىر كۇندەرى وتەتىن مەرەكەلىك ءىس-شارالارعا قاتىسادى.
دەيتۇرعانمەن، بيىل ەلىمىزدە 7 مامىر – وتان قورعاۋشىلار كۇنى جانە 9 مامىر – جەڭىس كۇنىنە وراي مەرەكەلىك پاراد وتپەيدى، دەپ حابارلايدى Almaty-akshamy.kz
"6 مامىردا ەلورداداعى «قازاقستان» كونسەرت زالىندا پرەزيدەنت قاسىم-جومارت توقايەۆتىڭ قاتىسۋىمەن مەرەكەلىك كونسەرت وتەدى. وندا مەملەكەت باسشىسى ارداگەر اسكەري قىزمەتشىلەردى، قاتارداعى اسكەري قىزمەتكەرلەردى، سونداي-اق، بارشا قازاقستاندىقتاردى مەرەكەمەن قۇتتىقتايدى. سونىمەن قاتار ەلىمىزدىڭ بارلىق وڭىرىندە جەڭىس كۇنىنە وراي «قۇرمەت» مەموريالدى مونۋمەنت الدىنا گۇل شوقتارى قويىلىپ، قۇرمەت كورسەتۋ جوسپارلانۋدا"، - دەدى قازاقستان قارۋلى كۇشتەرى باس شتابى باسشىسىنىڭ ورىنباسارى، تاربيە جانە يدەولوگيالىق جۇمىس جونىندەگى دەپارتامەنت باسشىسى، گەنەرال-مايور سەرىك بورانبايەۆ.
ونىڭ ايتۋىنشا، 7 جانە 9 مامىر كۇندەرى وتەتىن ءىس-شارالار وسكەلەڭ ۇرپاقتى پاتريوتتىق تاربيەلەۋگە، ۇرپاقتار ساباقتاستىعىن قامتاماسىز ەتۋگە جانە وتان ءۇشىن قازا تاپقانداردىڭ ەرلىگىن ەستە ساقتاپ، تاعزىم ەتۋگە باعىتتالعان.
"سونداي-اق، مەملەكەت باسشىسىنىڭ قاتىسۋىمەن 9 مامىردا نۇر-سۇلتان قالاسىنداعى «وتان قورعاۋشىلار» مونۋمەنتىنە گۇل شوعىن قويۋ ءراسىمى وتەدى. اتالعان ءداستۇر ەلىمىزدىڭ بارلىق وڭىرىندە ۇيىمداستىرىلادى"، - دەدى ول.