قانت زاۋىتى ءۇشىن ينۆەستور ىزدەپ جاتىر

زاۋىت 100 مىڭ تونناعا دەيىن شيكىزاتتى وڭدەي الادى

جەتىسۋ وبلىسىنىڭ الاكول اۋدانىندا ءۇشىنشى قانت زاۋىتىن قايتا ىسكە قوسۋ ءۇشىن ينۆەستورلار قاراستىرىلۋدا، دەپ حابارلايدى Almaty-akshamy.kz قازاقپارات-قا سىلتەمە جاساپ. ءۇش حالىقارالىق ءىرى قارجى ينستيتۋتتارىنىڭ وكىلدەرىمەن كەزدەسۋ بارىسىندا جەتىسۋ وبلىسىنىڭ اكىمى بەيبىت يسابايەۆ ينۆەستورلار ءۇشىن جەتىسۋ وڭىرىندە قولعا الۋعا بولاتىن جوبالاردى اتاپ، وسى باعىتتا ارىپتەستىك ورناتۋدى ۇسىندى. 

«بىزدە تۇتىنۋشىلاردى قاجەتتى مولشەردە قانتپەن قامتاماسىز ەتۋدە قيىندىق تۋىنداپ جاتىر. ەل بويىنشا 4 قانت زاۋىتى جۇمىس ىستەپ تۇرسا، سونىڭ ەكەۋى - ءبىزدىڭ وڭىرىمىزدە. ەكى زاۋىتىمىز دا جاڭعىرتۋدان وتكەن. قازىرگى ۋاقىتتا كوكسۋ قانت زاۋىتى جىل بويى جۇمىس ىستەپ تۇر، قانت قىزىلشاسى مەن قانت قامىسىن قايتا وڭدەيدى. ال، اقسۋ قانت زاۋىتىندا جوندەۋ جۇمىستارى جۇرگىزىلىپ جاتىر»، - دەدى بەيبىت يسابايەۆ. 

ونىڭ ايتۋىنشا، قامىس قانتىن قايتا وڭدەۋگە ارنالعان قۇرىلعىلاردى ورناتۋعا دايىندىق جۇمىستارى قولعا الىنعان. ەگەر الاكول اۋدانىنداعى زاۋىت ىسكە قوسىلسا، 100 مىڭ تونناعا دەيىن شيكىزاتتى وڭدەي الادى.