قازاقستاندىق عالىم قانت ديابەتىن ەمدەۋگە ارنالعان بىرەگەي جاسۋشا ويلاپ تاپتى
مولەكۋليارلىق بيولوگيا جانە بيوحيميا ينستيتۋتىنىڭ عالىمى باقىتجان ءالجان ۇلى گەنومدى رەداكسيالاۋ كومەگىمەن I ءتيپتى قانت ديابەتىن ەمدەۋگە ارنالعان بىرەگەي جاسۋشالاردى ويلاپ تاپتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
بۇل جاسۋشالاردى ترانسپلانتاسيالاۋ ۇيقى بەزىنە ينسۋلين وندىرۋگە عانا ەمەس، سونىمەن بىرگە ونىڭ دەنەدەگى دەڭگەيىن ءوز بەتىنشە رەتتەۋگە مۇمكىندىك بەرەدى.
بولاشاقتا قۇرىلىم ناۋقاس پاسيەنتتەردىڭ بەزىنە ترانسپلانتاسيالانادى.
«ءبىزدىڭ بۇل ءادىسىمىز بىرەگەي بولىپ ەسەپتەلەدى. جاسۋشا گەنومىن وڭدەۋ ءۇشىن قولدانىلاتىن CRISPR تەحنولوگياسىن پايدالانا وتىرىپ، ءبىز ينسۋلين سينتەزىنە جاۋاپ بەرەتىن ۇيقى بەزىنىڭ جاڭا جاسۋشالىق تىزبەگىن جاسادىق. ناقتى ءتۇسىندىرىپ وتسەم، الىنعان جاسۋشالار ەرەكشە سيپاتقا يە، ياعني جارىقتىڭ اسەرىنەن ولار ينسۋلين دەڭگەيىن جوعارىلاتۋى نەمەسە ونى تومەندەتۋى مۇمكىن. نەگىزگى ماقساتىمىز - ءى ءتيپتى قانت ديابەتىن ەمدەۋدىڭ زاماناۋي تاسىلدەرىن تابۋ بولدى. اتاپ ايتقاندا، ءوزىنىڭ تابيعي ءينسۋلينىن شىعاراتىن جاسۋشالىق تەراپيانى تابۋ بولدى»، - دەيدى باقىتجان ءالجان ۇلى.
بۇگىنگى تاڭدا الەمدە ءى ءتيپتى قانت ديابەتىن ەمدەۋ ءادىسى جوق، پاسيەنتتەر تەك ينسۋلين تەراپياسى بويىنشا ەمدەلەدى.
قازىرگى ۋاقىتتا دۇنيەجۇزى عالىمدارى ترانسپلانتاسيالاۋعا بولاتىن جاسۋشالاردى ازىرلەۋمەن اينالىسىپ جاتىر.
قازاقستاندىق بيوتەحنولوگ ءوز جۇمىسىندا بۇرىن-سوڭدى عىلىمدا قولدانىلماعان بەتا-كلەتكالاردى الۋ ءادىسى ارقىلى بىرەگەي ناتيجەلەرگە قول جەتكىزدى.
- ديففەرەنسياسيا جانە گەنومدى رەداكسيالاۋ ادىستەرىن بىرىكتىرۋ ارقىلى وسىنداي ناتيجەگە قول جەتكىزدىم. بۇل قورىتىندىنىڭ بىرەگەيلىگى مەن وزگە ادىستەردەن ارتىقشىلىعى وسىندا. ديففەرەنسياسيا - بۇل ادامنىڭ باعانالى جاسۋشالارىن اعزاداعى كەز كەلگەن ورگاننىڭ جاڭا جاسۋشالارىن الۋ ءۇشىن ماتەريال كوزى رەتىندە پايدالانۋ ءادىسى. زەرتتەۋ كەزىندە باعانالى جاسۋشالاردان وڭدەلگەن گەنومى بار ۇيقى بەزىنىڭ جاسۋشالارىن الدىق. دنق-نى رەداكسيالاۋ ءادىسى - بۇل گەندىك ينجەنەريا، دنق-نىڭ جەكە قۇرىلىمدىق ەلەمەنتتەرىن وزگەرتۋ. ياعني بۇل جەردە ءبىز الىنعان ۇيقى بەزىنىڭ جاسۋشالارىنان بىرەگەي قاسيەتتەرگە قول جەتكىزگەنىمىز تۋرالى ايتىپ وتىرمىز. دالىرەك ايتقاندا، جاسۋشالار ينسۋلين دەڭگەيىن ءوز بەتىنشە رەتتەي الادى. بۇل - الەمدە العاش رەت ويلاپ تابىلعان ءادىس، - دەپ ءتۇسىندىردى عالىم.
باقىتجان ءالجان ۇلى 2018 جىلى كانادادا عىلىمي-زەرتتەۋ جۇمىستارىن باستاپ، بىلتىر ونى ەلىمىزدەگى م.ا.ايتحوجين اتىنداعى مولەكۋليارلىق بيولوگيا جانە بيوحيميا ينستيتۋتىنىڭ بازاسىندا ءساتتى اياقتادى.
قازىرگى تاڭدا قولدانىستاعى حاتتامالاردى جەتىلدىرۋ جۇمىستارى جۇرگىزىلىپ جاتىر.