الماتىلىق دارىگەر قانت ديابەتىنە اكەپ سوقتىراتىن فاكتورلار تۋرالى ايتتى
دارىگەرگە ۋاقىتىلى قارالىپ ەمدەلمەگەن اۋرۋدىڭ ءبارى ءقاۋىپتى. ونىڭ ىشىندە قانت ديابەتى دە بار. جىلدا 14 قاراشادا دۇنيەجۇزىلىك قانت ديابەتىمەن كۇرەس كۇنى اتالىپ وتەدى. وسى ورايدا №7 قالالىق كلينيكالىق اۋرۋحانا ەمحاناسىنىڭ ەندوكرينولوگ-دارىگەرى ايدانا جولداسوۆا نە دەيدى؟
قانت ديابەتى – بۇل ينسۋلين گورمونىنىڭ جەتكىلىكسىزىدىگىمەن، سونداي-اق بارلىق زات الماسۋدىڭ بۇزىلۋىمەن سيپاتتالاتىن زات الماسۋ اۋرۋشاڭدىعى. قانت ديابەتىنە اكەپ سوقتىراتىن فاكتورلار: دەنەنىڭ ارتىق سالماعى (سەمىزدىك)، اسىرەسە، ابدومينالدى سەمىزدىك (ەر ادامنىڭ بەلىنىڭ كولەمى 102 سم جانە ودان دا جوعارى؛ ايەل بەلىنىڭ كولەمى 88 سم جانە ودان دا جوعارى بولۋى)؛ ارتەريالدىق گيپەرتونيا (قان قىسىمى 140/90 مم.رت.ست. جانە ودان جوعارى)؛ جاقىن تۋىستاردا (انا، اكە، اعا، اپكەدە) قانت ديابەتىنىڭ بولۋى؛ فيزيكالىق بەلسەندىلىكتىڭ تومەندىگى؛ قانداعى «مىقتى» حولەستەريننىڭ تومەنگى دەڭگەيى (لپۆپ 0،9 ممول/ل-دەن كەم) جانە تريگليسەريدتىڭ جوعارى دەڭگەيى (2،82 ممول/ل جانە ودان جوعارى)؛ جۇكتىلىك كەزىندەگى قانداعى قانتتىڭ جوعارى دەڭگەيدە بولۋى، بالانىڭ 4 كگ-دان ارتىق تۋىلۋى.
ال قانت ديابەتىنىڭ سيمپتومدارى: ۇنەمى شولدەۋ، اۋىزدىڭ قۇرعاپ كەتۋى؛ نەسەپتىڭ ءجيى شىعۋى؛ قاتتى شارشاۋ، السىزدىك؛ سالماق جوعالتۋ، كەيدە تابەتتىڭ كوتەرىلۋى؛ ەر ادامداعى ەرەكسيانىڭ تومەندەۋى؛ قابىنۋشىلىق ۇردىستەر، تەرىدەگى تىرناق ءىزى، تەز جازىلمايتىن جارالار، تىرتىقتار.
ەگەر سىزدە وسى ءقاۋىپتى فاكتورلاردىڭ بىرەۋى نەمەسە بىرنەشەۋى بايقالسا، گليۋكوزاعا قان تاپسىرعانىڭىز دۇرىس.
ديابەتتى ۋاقىتىندا انىقتاماۋ نەمەسە ەمدەلمەۋدىڭ سوڭى جاقسى بولمايدى. اتاپ ايتقاندا، جۇرەك-تامىر جۇيەسى زاقىمدانادى (ميوكارد ينفاركتى جانە مي ينسۋلتى)؛ كورۋ قابىلەتى تومەندەيدى (سوقىرلىققا دەيىن اپارۋى مۇمكىن)؛ بۇيرەك جەتكىلىكسىزدىگى؛ جۇيكە جۇيەسىنىڭ زاقىمدانۋى؛ گانگرەنا، اياقتى كەسۋ.
ەگەر ديابەت الدىنداعى بەلگىلەر پايدا بولسا نەمەسە وسى دياگنوز ناقتى قويىلعان جاعدايدا: قانداعى گليۋكوزانىڭ دەڭگەيىن ۇنەمى باقىلاپ وتىرۋ (ونىڭ ىشىندە گليۋكومەتتىڭ كومەگىمەن ءوز بەتىڭىزشە)؛ قانت جانە مايدى تۇتىنۋدى شەكتەۋ؛ دارىگەرىڭىز ۇسىنعان دارىلەردى ۋاقىتىلى ءىشىپ ءجۇرۋ قاجەت.
كەرەك كەڭەس
ەمدەۋ ادىستەرى
2 تيپتەگى قد – ۇزاق جانە تاباندى تەراپيانى تالاپ ەتەتىن اۋرۋ:
– پرەپاراتتاردى قابىلداۋ؛
– ديەتا؛
– ءومىر سالتىن وزگەرتۋ.
2 تيپتەگى قانت ديابەتىن ءتيىمدى ەمدەۋ تەك قانت ديابەتىنىڭ وزىمەن عانا ەمەس، سونىمەن قاتار ىلەسپەلى اۋرۋلارمەن كۇرەستى بىلدىرەدى، ولار: سەمىزدىك؛ گيپەرتونيا؛ انگيوپاتيا؛ نەيروپاتيا؛ دەپرەسسيا.