قازاقستاننىڭ 10 وڭىرىندە وسى بويىنشا ءىس تەرگەلىپ جاتىر.
Eolus كومپانياسى اتىمەن تىركەلگەن قارجى پيراميداسىنىڭ قۇرىلىمدىق بولىمشەلەرىنىڭ باسشىلارىنا قاتىستى قىلمىستىق ىستەر تەرگەلىپ جاتىر، - دەپ حابارلايدى Almaty-akshamy.kz قما مالىمەتىنە سىلتەمە جاساپ.
ىستەر اباي، اقمولا، اقتوبە، اتىراۋ، شىعىس قازاقستان، باتىس قازاقستان، جەتىسۋ وبلىستارىندا، سونداي-اق الماتى، استانا جانە شىمكەنت قالالارىندا تىركەلگەن.
"Eolus كومپانياسىنىڭ شىن مانىندە جۇمىس ىستەيتىنىڭ دالەلى رەتىندە، ۇيىمداستىرۋشىلار ENERGY EOLUS QAZAQSTAN ج ش س ءبىر ازاماتتىڭ اتىنا تىركەۋ ارقىلى ونى وزدەرىنىڭ قىلمىستىق ىس-ارەكەتىنە تارتقان. سالىمشىلار قاراجاتتى ينۆەستيسيالاۋ كەزىندە اقشانى الۋ ءۇشىن قاجەتتى سومانى جيناقتاي وتىرىپ، كۇن سايىن 2،5-تەن 3،5 پايىزعا دەيىن پايدا الادى. جاڭا پايدالانۋشى تارتىلعان كەزدە سالىم سوماسىنىڭ 10 پايىز مولشەرىندە ءبىرجولعى اقشالاي سىياقى، سونداي-اق جاڭا پايدالانۋشىنىڭ جىل ىشىندەگى كۇندەلىكتى تابىسىنىڭ 4 پايىزى تولەنەدى"، - دەلىنگەن حابارلامادا.
وسىلايشا، سىياقى سوماسى جىلدىق 3000 پايىز بولعان، ال ق ر ۇلتتىق بانكىنىڭ بازالىق مولشەرلەمەسى جىلدىق 16 پايىزدى كورسەتەدى. قازاقستانداعى وكىل اقشا قاراجاتىن ەكىنشى دەڭگەيدەگى بانكتەگى ءوز شوتىنا قابىلدايدى، سودان كەيىن كريپتوبيرجاعا اۋدارىپ، ايىرباستاۋدى جۇرگىزەدى. سوڭىندا كريپتوشەلەك ارقىلى energyeolus.top. پلاتفورماسىنداعى ءوز شوتىنا اۋدارادى.
"تارتىلعان ازاماتتاردىڭ جالپى سانى كەمىندە 3 000 ادام، ونىڭ ىشىندە 1 773 سالىمشى 259 ميلليون تەڭگە سوماعا مۇلىكتىك زيان كەلتىرىلگەنى جايلى ءوتىنىش بەرگەن. قما قارجى پيراميدالارىن قۇرۋ قىلمىستىق جاۋاپكەرشىلىككە اكەپ سوعاتىنىن جانە مۇلكى تاركىلەنىپ، 10 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازانى كوزدەيتىنىن ەسكەرتەدى. ەگەر ءسىز قارجى پيراميداسىنىڭ قۇربانى بولساڭىز، تۇرعىلىقتى جەرى بويىنشا ەكونوميكالىق تەرگەۋ دەپارتامەنتىنە حابارلاسۋىڭىزدى سۇرايمىز"، - دەلىنگەن قما تاراتقان حابارلامادا.