ق ر ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعىمەن قانداستار مەن قونىس اۋدارۋشىلاردى قابىلداۋدىڭ 2024 جىلعا ارنالعان وڭىرلىك كۆوتاسى 9 483 ادام دەپ بەلگىلەندى، بۇل 2023 جىلمەن سالىستىرعاندا 554 ادامعا ارتىق، دەپ حابارلايدى Almaty-akshamy.kz
بۇيرىقتىڭ ماقساتى قازاقستان رەسپۋبليكاسى ۇكىمەتى ايقىندايتىن وڭىرلەردە قانداستار مەن قونىس اۋدارۋشىلاردى وڭتايلى قونىستاندىرۋ. 2024 جىلى وڭىرلىك كۆوتا وبلىستار بويىنشا تومەندەگىدەي ءبولىندى:
- قانداستار ءۇشىن: پاۆلودار وبلىسى – 902، قوستاناي وبلىسى – 550، اقمولا وبلىسى – 285، شىعىس قازاقستان وبلىسى – 269، سولتۇستىك قازاقستان وبلىسى – 207 ادام، اباي وبلىسى – 220 ادام؛
- قونىس اۋدارۋشىلار ءۇشىن: سولتۇستىك قازاقستان وبلىسى – 2 702، پاۆلودار وبلىسى – 2 603، قوستاناي وبلىسى – 950، شىعىس قازاقستان وبلىسى – 372، اباي وبلىسى – 255، ۇلىتاۋ وبلىسى – 132، قاراعاندى وبلىسى – 36 ادام.
قانداستار مەن قونىس اۋدارۋشىلاردى قابىلداۋدىڭ وڭىرلىك كۆوتاسىنا ەنگىزىلگەن ادامدارعا مەملەكەتتىك قولداۋ شاراسى كورسەتىلەتىن بولادى، اتاپ ايتقاندا:
- كوشۋگە سۋبسيديالار – وتباسىنىڭ ءاربىر مۇشەسىنە 70 اەك بويىنشا ءبىرجولعى تولەم؛
- 12 اي ىشىندە ءبىر وتباسىنا 15-تەن 30 اەك-كە دەيىن تولەنەتىن تۇرعىن ءۇيدى جالداۋ (جالعا الۋ) جانە كوممۋنالدىق قىزمەتتەرگە اقى تولەۋ بويىنشا شىعىستاردى جابۋ ءۇشىن سۋبسيديالار؛
- 400 اەك مولشەرىندە قونىس اۋدارۋعا جاردەم كورسەتەتىن جۇمىس بەرۋشىلەر ءۇشىن سۋبسيديالار؛
- قىسقا مەرزىمدى كاسىپتىك وقىتۋعا جولداما؛
- جۇمىسقا ورنالاسۋعا نەمەسە كاسىپكەرلىك باستامانى دامىتۋعا جاردەمدەسۋ؛
- تۇرعىن ءۇي ساتىپ الۋعا ەكونوميكالىق موبيلدىلىك سەرتيفيكاتتارىن بەرۋ.
ەستەرىڭىزگە سالا كەتەيىك، 1991 جىلدان باستاپ 2024 جىلعى 1 قاڭتار ارالىعىندا 1 ملن 128،37 مىڭ ەتنيكالىق قازاق تاريحي وتانىنا ورالدى.
2023 جىلى 21،3 مىڭ ەتنيكالىق قازاق تاريحي وتانىمەن تابىسىپ، قانداس مارتەبەسىن الدى.