پيروتەحنيكالىق بۇيىمداردى زاڭسىز ساتقاندارعا 40 ملن تەڭگە ايىپپۇل سالىندى
ىشكى ىستەر مينيسترلىگى وتكەن جىلدىڭ 25 جەلتوقسانى مەن 2024 جىلدىڭ 3 قاڭتارى ارالىعىندا توتەنشە جاعدايلار مينيسترلىگىنىڭ ازاماتتىق قورعاۋ بولىمشەلەرى قىزمەتكەرلەرىمەن بىرلەسىپ “پيروتەحنيكا” جەدەل الدىن الۋ ءىس-شاراسىن وتكىزدى، – دەپ حابارلايدى اlmaty-akshamy.kz Polisia.kz-كە سىلتەمە جاساپ.
اتالعان ءىس-شارا نارىقتا سەرتيفيكاتتالماعان پيروتەحنيكالىق بۇيىمداردى ساتۋ فاكتىلەرىن انىقتاۋعا جانە جولىن كەسۋگە، سونداي-اق جەكە جانە زاڭدى تۇلعالارمەن پيروتەحنيكالىق بۇيىمداردىڭ اينالىمى قاعيدالارىنىڭ ساقتالۋىنا باعىتتالعان. ءىس-شارا بارىسىندا ازاماتتىق قورعاۋ بولىنىستەرى قىزمەتكەرلەرىمەن بىرلەسىپ ساۋدا ورىندارىندا 4،5 مىڭنان استام رەيد جۇرگىزىلدى.
پيروتەحنيكالىق بۇيىمداردىڭ اينالىمى قاعيدالارىنىڭ 900-دەن استام بۇزۋشىلىعى انىقتالدى (2022 جىلى 800 دەرەك).
بارلىق قۇقىق بۇزۋشى اكىمشىلىك جاۋاپكەرشىلىككە تارتىلدى: ونىڭ ىشىندە 800-دەن استامى ەركiن ساۋدا جاساۋعا زاڭناماسىمەن تىيىم سالىنعان تاۋارلاردى ساتقانى ءۇشىن، پيروتەحنيكانى پايدالانۋ ءتارتىبىن بۇزعانى ءۇشىن – 32، پيروتەحنيكانى ساقتاۋ جانە تاسىمالداعانى ءۇشىن – 4.
بۇزاقىلارعا شامامەن 40 ملن تەڭگەدەن استام ايىپپۇل سالىندى. ءىس-شارا بارىسىندا 12 مىڭنان استام سەرتيفيكاتتالماعان پيروتەحنيكالىق بۇيىم تاركىلەندى.
پيروتەحنيكالىق بۇيىمداردى پايدالانۋ كەزىندە جاراقات الۋدىڭ پروفيلاكتيكاسىنا ەرەكشە كوڭىل ءبولىندى. وكىنىشكە وراي، قابىلدانعان شارالارعا قاراماستان، ەلىمىزدە ازاماتتار وتشاشۋدى پايدالانۋ كەزىندە ساقتىق شارالارىن ساقتاماعاندىقتان كۇيىك الۋدىڭ 23 فاكتىسى تىركەلدى، ونىڭ ىشىندە 14 بالا بار.
مىسالى، اقتوبە قالاسىندا وتكەن جىلدىڭ 26 جەلتوقسانىندا كەشكە كوپقاباتتى ءۇيدىڭ اۋلاسىندا 16 جاستاعى ءجاسوسپىرىم پيروتەحنيكانى (جارىلعىش) دۇرىس پايدالانباعاننان كوزىنە زاقىم كەلگەن.
الماتى قالاسىندا 1 قاڭتار تۇنگى ۋاقىتتا اقجار شاعىن اۋدانىندا پيروتەحنيكالىق جارىلعىشتاردى قولدانۋ كەزىندە ساقتىق شارالارىن ساقتاماعاننان 10 جاسار بالانىڭ بەتى مەن قولى كۇيىپ قالدى. وسىعان ۇقساس جاعداي وسكەمەن قالاسىندا 1 قاڭتاردا بولدى. 13 جاسار ءجاسوسپىرىم وتشاشۋدى تاۋىپ الىپ جاققان، ول ونىڭ قولىندا جارىلعان، سالدارىنان بەتىن جانە ساۋساقتارى جارالانعان.
بۇدان باسقا ەرەسەك ادامدار كۇيىك جاراقاتىن الۋ فاكتىلەرى دە تىركەلدى. ولار الكوگولدىك ماس كۇيىندە قاۋىپسىزدىك شارالارىن ساقتاماي، پيروتەحنيكالىق بۇيىمداردى قولدانعان، سالدارىنان وزدەرى عانا ەمەس جانىندا كەتىپ بارا جاتقان ادامدار دا جاراقات العان.
– قورىتىندىلاي كەلە، ازاماتتارعا ايتارىم نۇسقاۋلىقتا جازىلعان پيروتەحنيكالىق بۇيىمداردى پايدالانۋ ەرەجەلەرىن ساقتاۋعا شاقىرامىن. وسى قاراپايىم ەرەجەلەردى ورىنداۋ سىزگە ءوز ءومىرىڭىز بەن جاقىندارىڭىزدىن دەنساۋلىعىن ساقتاپ قالۋعا نەگىز بولادى، – دەدى ق ر ءىىم اپك باسقارما باستىعى اسىلبەك ىدىرىسوۆ.