بەيجىڭ وليمپياداسى قانداس باۋىرلارىمىزدىڭ كوپتەپ قاتىسۋىمەن دە ەرەكشەلەندى.
جۇڭگو قۇراماسى ساپىندا كونكيشى اقنار اداق، شاڭعىشىلار ءبانيا جالەن جانە قادىس بەدەلحان ونەر كورسەتتى. اقنار جەكە جارىستاردا دا، كوماندالىق سىندا دا وتە جاقسى ونەر كورسەتىپ، جۇرت ىقىلاسىنا يە بولدى. 1000 مەتر قاشىقتىقتاعى جارىستان كەيىن ول وزىنە قولداۋ بىلدىرگەن قازاقستاندىقتارعا ارنايى بەينەشولۋمەن جاۋاپ قاتىپ، ىستىق ىقىلاسىن جەتكىزدى.
ال پحەنچحان وليمپياداسىنىڭ چەمپيونى، بياتلونشى دينارا الىمبەكوۆا (بەلارۋس) وسى جولى جۇلدەگە ىلىنە المادى. الەم كۋبوگىندا جەكە سىندا ەكىنشى ورىندا كەلە جاتقان قانداسىمىز بەيجىڭدە جەكە جارىستا جۇلدەگە مەيلىنشە جاقىن كەلگەن ەدى. ءبىراق سوڭعى اتۋ كەزەگىندە ءبىر رەت ءمۇلت كەتىپ، قولدا تۇرعان جۇلدەدەن ايىرىلدى.
قورىتا كەلگەندە، بەيجىڭ وليمپياداسى بەلگىلەنگەن مەرزىمدە، الايدا اسا زور شەكتەۋلەر اياسىندا وتكىزىلدى. شەتەلدىك تۋريستەر جۇڭگو استاناسىنا بارا العان جوق. قازاقستان قۇراماسى 8 سپورت تۇرىنەن جارىسقا ءتۇسىپ، سالىستىرمالى تۇردە شورت-ترەك، كونكيمەن جۇگىرۋ جانە فريستايل باعدارلامالارىنان ءتاۋىر ناتيجە كورسەتتى.
ال شاڭعىمەن جۇگىرۋ، بياتلون، شاڭعىمەن تۇعىردان سەكىرۋ، تاۋ شاڭعىسى سپورتىنان كورسەتكىش تىم تومەن بولدى. تۇڭعىش رەت وليمپياداعا قاتىسقان شاڭعى قوسسايىسىنان دا سپورتشىمىز ايتارلىقتاي جوعارى جەتىستىككە جەتە المادى.
ەستەن سابالاق