قانداس مارتەبەسىن العاندار سانى ارتتى

جىل باسىنان بەرى 7،4 مىڭنان استام ەتنيكالىق قازاق قانداس مارتەبەسىن العان.

قازاقستان ۇكىمەتى جىل باسىنان بەرى شەتەلدەن كەلگەن قانشا قازاق قانداس مارتەبەسىن العانىن جاريالادى، دەپ حابارلايدى Almaty-akshamy.kz.

«2022 جىلعى 1 شىلدەدەگى جاعداي بويىنشا، 7 415 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. جالپى، 1991 جىلدان بەرى رەسپۋبليكاعا 1 ميلليون 95،3 مىڭ ەتنيكالىق قازاق ورالدى»،- دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.

جىل باسىنان بەرى قازاقستانعا كەلگەن قانداستاردىڭ جارتىسىنان كوبى (70،2%) وزبەكستاننان، 10،4% – قىتايدان، 7،4% – تۇرىكمەنستاننان، 3،2% – موڭعوليادان جانە 8،8% باسقا ەلدەردەن قونىس اۋدارعان.

كەلگەن ەتنيكالىق قازاقتار نەگىزىنەن الماتى (31،6%)، ماڭعىستاۋ (18،3%)، تۇركىستان (9،8%) جانە جامبىل (6،3%) وبلىستارىنا، سونداي-اق الماتى (5،7%)، نۇر-سۇلتان (7،1%) جانە شىمكەنت (8،1%) قالالارىنا قونىستاندى.

وسى جىلعى 1 شىلدەدەگى جاعداي بويىنشا، ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 62%، ەڭبەككە قابىلەتتى جاستان كىشى قونىس اۋدارۋشىلار سانى 24،1% جانە زەينەتكەرلەر سانى 13،9%.

ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 11،4%-ى جوعارى ءبىلىمدى، 40،3%-ى ورتا كاسىبي ءبىلىمدى، 47%-ى جالپى ورتا ءبىلىمدى جانە 1،6%-نىڭ ءبىلىمى جوق.