قانداي نەسيە كەشىرىلەدى؟

ەگەر جالعان نەسيە ەكەنى انىقتالسا.

ماجىلىستە قارجى نارىعىن دامىتۋ جانە رەتتەۋ اگەنتتىگىنىڭ (قندرا) ءتوراعاسى ءمادينا ءابىلقاسىموۆا الاياقتىقپەن كۇرەسۋ شارالارى تۋرالى ايتتى، دەپ حابارلايدى Almaty-akshamy.kz.

ءابىلقاسىموۆانىڭ ايتۋىنشا، اگەنتتىك ەكىنشى دەڭگەيلى بانكتەرمەن مەموراندۋم دايىنداپ، ءقازىر قول قويۋ بارىسىندا، وعان سايكەس، بانكتىك وپەراسيا الاياقتىق دەپ تانىلسا، مۇنداي نەسيە بويىنشا سىياقى ەسەپتەۋ توقتاتىلادى.

"سوتتا مۇنىڭ جالعان نەسيە ەكەنى جانە پايدالانۋشىنىڭ ءوزى بۇل قاراجاتتى الماعانى دالەلدەنگەن كەزدە، بانك بۇل سومانى قايتارادى. نەسيە تولىعىمەن ەسەپتەن شىعارىلادى نەمەسە ەگەر ول پايدالانۋشىنىڭ جەكە قاراجاتى بولسا، وعان قايتارىلادى"، – دەدى ءابىلقاسىموۆا.

بۇل رەتتە قارجى رەتتەۋشىسىنىڭ ءتوراعاسى بۇل ءۇشىن زاڭنامالىق دەڭگەيدە بەلگىلى ءبىر وزگەرىستەر قاجەت بولاتىنىن جانە ولار دەپۋتاتتاردىڭ قولداۋىنا ءۇمىت ارتىپ وتىرعانىن اتاپ ءوتتى.

"سونىمەن قاتار، جول كارتاسى اياسىندا تۇزەتۋلەر دايىندادىق. اقپاراتتىق قاۋىپسىزدىك پروسەدۋرالارىن ساقتاماۋ سالدارىنان الاياقتىق تىركەلگەن جاعدايدا قارجىلىق ۇيىمنىڭ زالالدى وتەۋ جاۋاپكەرشىلىگىن زاڭنامالىق دەڭگەيدە بەلگىلەۋدى ۇسىنامىز. وسى ماسەلەلەردى پارلامەنت قاراۋىنا ەنگىزۋگە قولداۋ كورسەتۋدى سۇرايمىز"، - دەپ قوستى اگەنتتىك ءتوراعاسى.