قازاقستان زاڭناماسىندا بالاعات سوزدەر ءۇشىن جاۋاپكەرشىلىك بۇرىننان كوزدەلگەن.
ءىىم اكىمشىلىك پوليسياسى كوميتەتى باسقارما باستىعىنىڭ مىندەتىن اتقارۋشى ازامات قۇرىمبايەۆ بالاعات ءسوز ايتقاندارعا قولدانىلاتىن جازا تۇرلەرى جايىندا سۇراقتارعا جاۋاپ بەردى، دەپ حابارلادى Almaty-akshamy.kz Polisia.kz سايتىنا سىلتەمە جاساپ.
سوڭعى كۇندەرى الەۋمەتتىك جەلىدە بالاعات ءسوز ءۇشىن جاۋاپكەرشىلىك كۇشەيدى دەگەن اڭگىمە كوبەيدى.
ازامات قۇرىمبايەۆتىڭ ايتۋىنشا، قازاقستان زاڭناماسىندا بالاعات سوزدەر ءۇشىن جاۋاپكەرشىلىك بۇرىننان كوزدەلگەن. مىسالى، باسقا ادامنىڭ ار-نامىسى مەن قادىر-قاسيەتىن قورلاۋ –قىلمىس.
«ول ءۇشىن 100 اەك-كە دەيىن ايىپپۇل سالۋ نەمەسە 120 ساعاتقا دەيىن تۇزەۋ، يا بولماسا قوعامدىق جۇمىستارعا تارتۋ تۇرىندە جاۋاپكەرشىلىك كوزدەلگەن. جازا سوت ارقىلى ەسكەرتۋ نەمەسە 5 تاۋلىككە دەيىن قاماققا الۋ تۇرىندە بولۋى مۇمكىن»، - دەيدى ول.
ال قوعامدىق ورىنداردا بىلاپىت سويلەۋ، جەكە تۇلعالارعا قورلاپ ءتيىسۋ، عيماراتتاردى، وزگە دە قۇرىلىستاردى، تۇرعىن ءۇي-جايلاردى بۇزۋ، ورتاق پايدالانىلاتىن ورىنداردى، كولىكتەگى جانە وزگە دە قوعامدىق ورىندارداعى مۇلىكتى ءبۇلدىرۋ جانە قوعامدىق ءتارتىپتى جانە جەكە تۇلعالاردىڭ تىنىشتىعىن بۇزاتىن باسقا دا وسىنداي ارەكەتتەر ۇساق بۇزاقىلىققا جاتادى.
بالاعات سوزدەر ءۇشىن جاۋاپكەرشىلىك قانشالىقتى كۇشەيدى؟
«ءيا، وسى جىلدان باستاپ ۇساق بۇزاقىلىق جاساعانى ءۇشىن جازا كۇشەيتىلەدى. بۇل ەڭ الدىمەن قوعامدىق ءتارتىپتى بۇزۋدى بولدىرماۋ ماقساتىندا جاسالدى. ءقازىر بىرەۋ قوعامدىق ورىندا بالالاردىڭ نەمەسە اعا بۋىن ادامداردىڭ كوزىنشە اينالاسىنداعىلاردى سىيلاماي، قوعامدىق ءتارتىپتى بۇزىپ، بالاعات ءسوز ايتقان جاعدايدا، بۇل ءۇشىن 17 250 تەڭگە كولەمىندە ايىپپۇل سالىنادى نەمەسە 10 تاۋلىككە دەيىن قاماۋعا الىنادى»، - دەيدى باسقارما باسشىسى.
ازامات قۇرىمبايەۆ 6 ناۋرىزدان باستاپ مۇنداي ارەكەتتەر ءۇشىن 20 اەك (69 مىڭ تەنگە تۇرىندەگى جازا) ايىپپۇل سالىناتىنىن نەمەسە 5-تەن 15 تاۋلىككە دەيىن قاماۋعا الىناتىنىن اتاپ ءوتتى.
ەگەر بىرەۋ جاي عانا «مەنى بالاعاتتادى» دەپ ايتسا، ايىپپۇل سالىنا ما؟
قۇرىمبايەۆتىڭ ايتۋىنشا، ءاربىر ءوتىنىش بويىنشا پوليسيا قىزمەتكەرلەرى دالەلدەمە جينايدى. ازاماتتاردىڭ ءوتىنىشى، كۋاگەرلەردىڭ ايعاقتارى، سونداي-اق قۇقىق بۇزۋشىلىقتىڭ اۋديو-، بەينەتۇسىرىلىمى، قاجەت بولعان جاعدايدا ساراپشىنىڭ قورىتىندىسى ەسكەرىلەدى. قۇقىقتىق باعانى سوت بەرەدى.
جەكە مەنشىك ۇيىندە، كولىگىندە بالاعاتتاعانى ءۇشىن جازا قاراستىرىلعان با؟
ءبارى ءمان-جايعا بايلانىستى. ۇساق بۇزاقىلىق بويىنشا جاۋاپكەرشىلىككە تارتۋعا قوعامدىق ورىنداردا بالاعات ءسوز ايتۋ، اينالاسىنداعىلاردى سىيلاماۋ، سونداي-اق قوعامدىق ءتارتىپ پەن ازاماتتاردىڭ تىنىشتىعىن بۇزۋ مىندەتتى شارت بولىپ سانالادى.
الەۋمەتتىك جەلىدە بالاعات ءسوز ايتقاندارعا قالاي ايىپپۇل سالىنادى؟
ازامات قۇرىمبايەۆتىڭ مالىمەتىنشە، الەۋمەتتىك جەلىلەردە ايتىلعان بالاعات ءسوز قوعامدىق ورىنداردا نەمەسە اينالاسىنداعىلارعا سىيلاماۋشىلىق تانىتىپ، ازاماتتاردىڭ تىنىشتىعىن بۇزسا، ول ءۇشىن جاۋاپكەرشىلىك ۇساق بۇزاقىلىق بابىمەن قاراستىرىلادى.
قاي تىلدەگى بالاعات سوزدەرگە ايىپپۇل سالىنادى؟
جوعارىدا اتالعان جاعدايلار بولعان كەزدە قاي تىلدە بولسىن بالاعات ءسوز ايتقانى ءۇشىن جاۋاپكەرشىلىك تۋىندايدى.