ارقانىڭ ايازى قاھارىنا ءمىندى.
استانادا بىرنەشە كۇن بۇرىن جاياۋ جۇرگىنشىلەر جولى كوكتايعاققا اينالعان ەدى. سودان بەرى كوشەلەر ءالى تولىق تازالانىپ بىتپەي جاتىر، دەپ حابارلايدى Almaty-akshamy.kz 24.kz-كە سىلتەمە جاساپ.
اياقتارىنا كونكي كيىپ، ەمىن-ەركىن سىرعاناعانداردى كورسەڭىز، تاڭ قالۋدىڭ قاجەتى جوق. باس قالانىڭ ورتالىعىندا تروتۋارلار كوكتايعاققا اينالدى. بىرنەشە كۇننەن بەرى جۇرتتىڭ ءجۇرىس-تۇرىسى ءبىرشاما قيىندادى. ءتىپتى كەي تۇرعىندار قىستىق اياق ءقيىمىن كونكيگە ايىرباستاي باستادى.
ەتىگىن كونكيگە اۋىستىرعان تۇرعىننىڭ ءبىرى - دياس ءابدىراحمان. كوكتايعاقتى ەرمەگىنە اينالدىرعان ول كونكيدى كولىك ەتىپ ءجۇر. "كوشەدەگى ايناداي مۇزدى كورىپ، ەركىن سىرعانۋعا بولاتىنىن بايقادىم"، - دەيدى ول.
«جۇمىستان شىققاندا، كوكتايعاقتى كوزىم شالدى. كوشەدەگى ايناداي مۇزدىڭ ۇستىمەن كونكي ارقىلى سىرعاناۋعا بولاتىنىن بىردەن بايقادىم. وسىلايشا، قىزىعۋشىلىقپەن ۆيدەوعا ءتۇسىرىپ، الەۋمەتتىك جەلىگە جۇكتەدىم. ارتىق استار بولمادى. ءبىراق، سول بەينەتاسپادان كەيىن اكىمدىكتەگىلەر مەن ءجۇرىپ وتكەن جولدى قايتا قالپىنا كەلتىردىك دەپ حابارلادى»، - دەيدى قالا تۇرعىنى دياس ءابدىراحمان.
كوشەدەگى قالىڭ مۇز بىرەۋگە ەرمەك بولسا، ەندى بىرەۋلەر جەرگە قۇلاپ، جاراقات الامىز با دەپ ۇرەيلەنەدى. تروتۋاردان بولەك، ايالدامالارداعى مۇز دا ءالى الىنباعان. "ادىمدى اڭدىپ باساتىن بولدىق"، - دەيدى تۇرعىندار.
«تاڭەرتەڭ جۇمىسقا بارعاندا قينالامىز. شىققاندا قۇلايمىز عوي. بىزدە جۇمىستا ءبىر قىز قۇلاپ قالىپ، قولىن سىندىرىپ الدى»، - دەيدى تۇرعىنداردىڭ ءبىرى.
«ادامعا وتە ءقاۋىپتى. ءجۇرۋ وتە قيىن. وسى جىلى 5-6 رەت قۇلادىم. ءبىراق شاما كەلگەنشە ەش جەردى سىندىرماۋعا، اۋىرتپاۋعا تىرىسامىز. قيىنداۋ»، - دەيدى تاعى ءبىر استانالىق تۇرعىن.