قازاق بوكسشىسى قانات يسلام ارگەنتينالىق حاۆەر فرانسيسكو ماسەلدەن باسىم ءتۇستى، دەپ حابارلايدى Almaty-akshamy.kz Inform.kz-كە سىلتەمە جاساپ.
اقش-تىڭ فلوريدا شتاتىنداعى پلانت-سيتيدە وتكەن بوكس كەشىندە 38 جاستاعى وتانداسىمىز ارگەنتينالىق قارسىلاسىن جەڭىپ، كاسىپقوي رينگتەگى 28-جەڭىسىن تىركەدى.
8 راۋندىق جەكپە-جەكتىڭ ەكىنشى راۋندىنان باستاپ قانات يسلامنىڭ باسىمدىعى ايقىن سەزىلىپ تۇردى. ارگەنتينالىق بوكسشى ۇنەمى قورعانىستى ويلاپ، قازاق بوكسشىسىنان جاسقانشاتاپ جۇرگەندەي كورىنگەنىمەن، قانات يسلامنىڭ شارشى الاڭداعى بەلسەندى قيمىلدارى سونشالىق ءقاۋىپ توندىرە قويمادى.
6-راۋندتا قاناتتىڭ مۇرنى سىرتىنان قاناعانى بايقالدى. الايدا بۇل كەزدەسۋدى مەرزىمىنەن بۇرىن اياقتايتىنداي اۋىر جاراقات ەمەس ەدى.
كەزدەسۋدىڭ اقتىق راۋندى دا قانات يسلامنىڭ باسىمدىعىمەن باستالدى. راۋند اياقتالار تۇستا قازاق بوكسشىسىنىڭ ءبۇيىردى كوزدەگەن اۋىر سوققىسىنان كەيىن رينگتەگى تورەشى نوكداۋن تىركەدى.
وسىلايشا تورەشىلەر قازاق بوكسشىسىنىڭ ۇپاي سانىمەن جەڭىسىن جاريالادى.
ايتا كەتەيىك، بۇعان دەيىن قانات يسلام 28 جەكپە-جەك وتكىزىپ، ونىڭ 27-سىندە جەڭىسكە جەتىپ، بىرەۋىندە عانا جەڭىلگەن. حاۆەر ماسەل وسىمەن 52 جەكپە-جەگىنە شىقتى. 51 ايقاستىڭ 34-ىندە جەڭىپ، 17-سىندە جەڭىلگەن.