وبلىس اكىمى قالا تۇرعىندارىمەن كەزدەستى.
تەكەلى قالاسىنا مامىر ايىندا تازا اۋىز سۋ بەرىلەدى. بۇل تۋرالى وبلىس اكىمى قالا تۇرعىندارىمەن بولعان كەزدەسۋ بارىسىندا ايتتى، دەپ حابارلادى Almaty-akshamy.kz
«وتىز ءۇش مىڭداي تۇرعىنى بار تەكەلى قالاسىنا اۋىز سۋ نەگىزىنەن قورا وزەنىنەن بەرىلىپ كەلگەن. كوكتەم مەزگىلىندە قار سۋىنان، جاڭبىردان وزەن سۋى لايلانىپ، قالا حالقى تازا سۋعا ءزارۋ بولىپ قالاتىن. «بۇل ماسەلە تۇبەگەيلى شەشىلەدى»، - دەدى بۇگىن قانات بوزىمبايەۆ تەكەلى قالاسىنىڭ تۇرعىندارىمەن كەزدەسۋىندە. سونداي-اق، وتكەن عاسىردان بەرى شەشىلمەي كەلە جاتقان ەكولوگيا پروبلەماسى دا وڭ شەشىمىن تاپپاق»، - دەلىنگەن الماتى وبلىسى اكىمىنىڭ باسپا ءسوز قىزمەتىنىڭ حابارلاماسىندا.
تەكەلىدە وبلىس اكىمى وسىدان ءبىر اي بۇرىن بولىپ، حالىقتىڭ تالاپ-تىلەكتەرىنە وراي جەرگىلىكتى اتقارۋشى بيلىككە ءبىرقاتار تاپسىرما بەرگەن بولاتىن. بۇگىنگى كەزدەسۋدە سول تاپسىرمالاردىڭ ورىندالۋىن بايانداپ، قالانىڭ الداعى دامۋ باعىتىن ايتتى.
وبلىس باسشىسى تەكەلىلىكتەرگە كۇنى كەشە «سانلايت ينۆەستمەنتس» جشس-مەن مەموراندۋمعا قول قويعانىن جەتكىزدى. كەلىسىمگە سايكەس، تەكەلىدەگى زياندى قالدىقتار قويماسىن رەكۋلتيۆاسيالاپ، قويما قالدىقتارىن جاڭادان سالىناتىن ءىرى تاۋ-كەن بايىتۋ كومبيناتىندا شيكىزات رەتىندە پايدالانۋ قولعا الىنباق. وسىلايشا، قالا شەتىندەگى قالدىق قويما تولىقتاي تازارتىلىپ، قالادان الىس جەرگە كوشىرىلمەك. جوبا 2022-2032 جىلداردا ىسكە اسىرىلادى. بۇل تەكەلىلىكتەردىڭ شەشىمىن كۇتكەن ەڭ وزەكتى ماسەلەسىنىڭ ءبىرى بولاتىن.
ال، بيىل تەمىردى قالپىنا كەلتىرۋمەن اينالىساتىن، جىلدىق قۋاتى 120 مىڭ توننالىق «ەلەكترومارگانەس» ج ش س زاۋىتى ىسكە قوسىلادى. وعان 15،6 ملرد. تەڭگە ينۆەستيسيا تارتىلىپ، 1 مىڭداي جۇمىس ورنى اشىلادى.
سونداي-اق، قالاداعى اپاتتى ۇيلەردىڭ ماسەلەسى دە كەزەڭ-كەزەڭىمەن شەشىلەدى. وبلىس اكىمىنىڭ ايتۋىنشا، بولتىرىك شەشەن، قونايەۆ، كوشيەۆوي، تولە بي كوشەلەرىندەگى اپاتتى ۇيلەردىڭ تۇرعىندارىن كوشىرىپ ورنالاستىرۋعا قاجەتتى قارجى ءبولۋدى ءماسليحات قاراستىرۋدا. الدىڭعى ساپاردا كوتەرىلگەن ماسەلەلەردىڭ ىشىندە ءبىرىنشى، ەكىنشى كوردون تۇرعىندارىنىڭ پروبلەمالارى دا شەشىلگەن. اتاپ ايتقاندا، ءدارىحانا پۋنكتى قۇرىلدى، قونايەۆ كوشەسىنىڭ كوشيەۆوي كوشەسىنە بۇرىلىسىن اباتتاندىرۋعا، جيىرما كوشەنى ورتاشا جوندەۋگە جانە ءبىرىنشى، ەكىنشى كوردوندى جارىقتاندىرۋعا جوبالاۋ-سمەتالىق قۇجاتتامالار ازىرلەندى. دەگەنمەن ينۆەستيسيا تارتۋ، جاڭا جۇمىس ورىندارىن اشۋ ءىسى ءالى دە ارتتا قالىپ كەلەدى. تەكەلىنىڭ ينۆەستيسيا تارتۋدا وبلىستاعى ۇلەسى نەبارى 0،2%.
«تەكەلىدەگى وندىرىستىك ايماقتا بوس جەر جوق، كاسىپورىنداردىڭ ءبىرازى ماۋسىمدىق كەزەڭدەردە عانا جۇمىس ىستەيدى، قۇرال-جابدىقتارى توزعان. ماسەلەن، «سۋففلە قازاقستان» اشىقتى زاۋىتىندا شيكىزات جەتىسپەيدى، تازا سۋمەن قامتۋدا قيىندىقتار بار. سوندىقتان وبلىستا ارپا ءوسىرۋ كولەمىن ارتتىرىپ، زاۋىتتى ءوز شيكىزاتىمىزبەن قامتاماسىز ەتۋدى تاپسىرامىن. كاسىپورىندى تازا سۋمەن قامتۋعا قاجەتتى قۇجاتتاردى ءتيىستى مەكەمە جىلدام دايىنداپ ءبىتىرۋى كەرەك. قالا اكىمىنىڭ بۇل باعىتتاعى جۇمىسى سىلبىر. تەكەلىنىڭ تابيعي-رەكرەاسيالىق الەۋەتى زور، ىشكى ءتۋريزمدى تەڭ دامىتۋعا بولادى. ول ءۇشىن تۋريستىك ينفراقۇرىلىمدى دامىتۋدىڭ ناقتى جوسپارى جاسالۋى ءتيىس. قالادا شاعىن جانە ورتا بيزنەستى دە وركەندەتۋگە مۇمكىندىك مول. سوعان قاراماستان، تەكەلىنىڭ وبلىستاعى شاعىن جانە ورتا بيزنەستەگى ۇلەسى 1% عانا. «تالدىقورعان – تەكەلى» ماگيسترالدى گاز قۇبىرى 2018 جىلى تارتىلعانىمەن، بۇگىنگە دەيىن 51 جەكە تۇرعىن ءۇي عانا گازعا قوسىلعان»، - دەدى قانات بوزىمبايەۆ. باسقا دا ولقىلىقتاردى اتاپ وتكەن وبلىس باسشىسى جۇمىستى جانداندىرۋعا قاتىستى ناقتى تاپسىرمالار بەردى.
كەزدەسۋگە كەلگەن تۇرعىندار وبلىس باسشىسىنا 50-گە جۋىق ساۋال قويدى. اسىرەسە، تۇرعىن ۇي-كوممۋنالدىق شارۋاشىلىق، جول-كولىك سالالارىندا قوردالانعان ماسەلەلەر كوپ ەكەنى بايقالدى.
