№62 گيمنازيانىڭ 62 وقۋشىسى ناۋرىزدى ناقىشتادى
«قامقوردىڭ» الەۋمەتتىك ءۇيىنىڭ ەرەكشەلىگى، جالعىزباستى زەينەتكەردىڭ ءوز پاتەرى بار. ناۋرىز قارساڭىندا وتكىزىلگەن شارادا جاناشىر جاندار – كاسىبي مۋزىكانتتار، گيمنازيا وقۋشىلارى كەلىپ، اتا-اجەلەرىنە ونەرىن كورسەتىپ، سىي-سياپاتىن جاساپ، قارتتاردىڭ ريزاشىلىعىنا بولەنىپ، باتاسىن الدى.
«قالامىزدىڭ جۇمىسپەن قامتۋ جانە الەۋمەتتىك باعدارلامالار باسقارماسىنا قاراستى بۇل الەۋمەتتىك ءۇي 2002 جىلى اشىلعان. تمد بويىنشا تەك ماسكەۋدە عانا وسىنداي «قارتتار ءۇيى» بار. بۇل نىسان سول جوبامەن قولعا الىنعان بولاتىن. مۇندا 74 پاتەر بار. سونىڭ 42 پاتەرىندە قاريالار تۇرىپ جاتىر. بۇگىن مۇندا قۇتتىقتاپ كەلگەندەر -- ونەرلى دە ونەرپاز توپتار: «الماتى اۋەندەر» كومپانياسىنا قاراستى مۇرات سەركەبايەۆ باسقاراتىن كامەرالىق اسپاپتىق وركەستردىڭ كۆارتەتى، №62 گيمنازيانىڭ ونەرپاز-وقۋشىلارى. وقۋشىلار اۋەلەتە ءان شىرقاپ، مىڭ بۇرالا بيلەدى، ءوز ونەرىمەن ءتانتى ەتتى»، -- دەدى «قامقور» الەۋمەتتىك ءۇيىنىڭ ديرەكتورى تۇراربەك تۇمانشييەۆ.
ۇلى ابايدىڭ 14-قاراسوزىنە جۇگىنەر بولساق، ناۋرىزدىڭ ءمان-ماڭىزى تۇسىنىكتى بولا تۇسەر. ناۋرىز ادامزاتقا راقىمدىلىق پەن مەيىرباندىلىق اكەلەتىن مەرەكە. مەملەكەت باسشىسىنىڭ ناۋرىز مەرەكەسىن مازمۇندى دا ءماندى وتكىزۋ تاپسىرماسىمەن «ناۋرىزناما» ونكۇندىگىنە وراي، «قايىرىمدىلىق كۇنىندە» قارتتار ورنالاسقان الەۋمەتتىك ۇيگە كەلىپ، شاكىرتتەر ءوز ونەرىن كورسەتتى.
«قازىنالى قارتتارعا كوتەرىڭكى كوڭىل-كۇي سىيلاعان المالى اۋدانىنداعى №62 گيمنازيادان 62 ونەرپاز شاكىرت ناۋرىزدى ناقىشتاپ، ءان سالىپ، بي بيلەدى. مەكتەبىمىزدەن «مۇراگەر» وركەسترى، «نارگيز» بي توبى ونەر كورسەتۋدە. باستاۋىش سىنىپتان جاساقتالعان «تاتتىلەر» توبى دا ونەر كورسەتۋدە. اتالعان وركەسترىمىز، ونەر توپتارى -- قالالىق، رەسپۋبليكالىق ونەر بايقاۋلارىن ايتپاعاندا، حالىقارالىق كونكۋرستا دا جۇلدە العان ونەرپازدار. قاريالارعا قۇرمەتىمىز ايرىقشا، ازىرلەپ الىپ كەلگەن تاتتىلەردەن ءدام تاتقىزدىق»، -- دەيدى شونا سماحان ۇلى اتىنداعى №62 گيمنازيا ديرەكتورى مەيرامگۇل ءنابيدوللا قىزى.
قارتتاردىڭ كوڭى-كۇيى كەرەمەت. ونەرلى جاستار، بالالار ءان شىرقادى، كۇي توكتى. «ءان – كوڭىلدىڭ اجارى» عوي. ساز-اۋەننىڭ جاندى جادىراتاتىنى بار.
«مۇندا ءبارى جانعا جايلى، جاعدايىمىز جاقسى. مەرەكەلىك كوڭىل-كۇي تا-ما-شا! ناۋرىز – جاڭا جىل باسى، بەرەكە-بىرلىك، تاتۋلىقتىڭ مەرەكەسى. بۇگىن ونەر كورسەتكەن مۇرات سەركەبايەۆتىڭ جەتەكشىلىگىندەگى كامەرالىق وركەستردىڭ كۆارتەتىنە، ونەرپاز وقۋشىلارعا ريزا بولدىق. اكىمشىلىكتىڭ بىزگە دەگەن كوڭىل بولۋىنە ءدان ريزامىز. «قامقوردا» قامقورلىققا بولەنۋدەمىز»، -- دەيدى الەۋمەتتىك ءۇيدىڭ تۇرعىنى زۋلفيرا اپامىز.