قازاقستاندا ورتا ءبىلىم بەرۋ ۇيىمدارىنىڭ 67%-ى (5236 مەكتەپ) اۋداندىق جانە اۋىلدىق جەرلەردە ورنالاسقان، بۇل ءبىلىم بەرۋ وشاقتارىندا 1،6 ميلليون بالا وقيدى.
قالالىق جانە اۋىلدىق مەكتەپتەر ءۇشىن ءبىرىڭعاي ءبىلىم بەرۋ ستاندارتتارى ەنگىزىلۋدە، دەپ حابارلايدى وقۋ-اعارتۋ مينيسترلىگىنىڭ باسپا ءسوز قىزمەتى.
مەملەكەت باسشىسىنىڭ تاپسىرماسىنا سايكەس تاياۋداعى ءۇش جىل ىشىندە ەلىمىزدىڭ بارلىق وڭىرىندە 1231 مەكتەپتى رەنوۆاسيالاۋ جوسپارلانۋدا، ونىڭ ىشىندە 820 مەكتەپ اۋىلدىق جەرلەردە ورنالاسقان.
وقۋ-اعارتۋ مينيسترلىگىمەن مەكتەپتەردى رەنوۆاسيادان وتكىزۋدىڭ جيىنتىق جوسپارى بەكىتىلدى، وبلىس اكىمدىكتەرى 2025-2027 جىلدارعا ارنالعان وڭىرلىك جوسپارلاردى ازىرلەدى. رەنوۆاسيادان وتكىزۋدە مەكتەپتەردى كۇردەلى جوندەۋ، زاماناۋي پاندىك كابينەتتەرمەن جابدىقتاۋ، مەكتەپ جيھازدارىن جاڭارتۋ، كىتاپحانالار مەن اسحانالاردى جاڭعىرتۋ، سپورت زالدارىن سالۋ نەمەسە رەكونسترۋكسيالاۋ، قوعامدىق كەڭىستىكتەردى جابدىقتاۋ، سونداي-اق قاۋىپسىزدىك جۇيەلەرىمەن قامتاماسىز ەتۋ قاراستىرىلعان.
بۇل شارالار مەكتەپتەردىڭ ماتەريالدىق-تەحنيكالىق بازاسىن جاقسارتۋعا، يننوۆاسيالىق ءبىلىم بەرۋ تەحنولوگيالارىن ەنگىزۋگە جانە پەداگوگتەردىڭ بىلىكتىلىگىن ارتتىرۋعا مۇمكىندىك بەرەدى.
جوبا ءۇش جىلدا جۇزەگە اسىرىلادى: 2025 جىلى 262 مەكتەپ، 2026 جىلى 436 مەكتەپ، 2027 جىلى 466 مەكتەپ. قوسىمشا 2028-2029 جىلدارى جامبىل وبلىسىندا 67 مەكتەپ جاڭعىرتىلادى.